बर्फ उत्पादकांना एफडीएची नोटीस

अन्न व औषध प्रशासनाने कारवाई केली, न्यायालयापर्यंत प्रकरण नेले, तर आम्ही औद्योगिक वापराचे बर्फ उत्पादित करतोे.

पिंपरी : अन्न व औषध प्रशासनाने कारवाई केली, न्यायालयापर्यंत प्रकरण नेले, तर आम्ही औद्योगिक वापराचे बर्फ उत्पादित करतोे. हे बर्फ खाण्यायोग्य नाही, असे फलक कंपन्यांमध्ये लावतो. येथून बर्फ नेणारे त्याचा उपयोग खाद्यपदार्थांमध्ये करतात की अन्य कोठे करतात, याच्याशी आमचा काही संबंध नाही. अशी कारवाईतून सहीसलामत बाहेर पडण्याची पळवाट शोधून ठेवलेले बर्फ उत्पादक अडचणीत सापडले आहेत. अन्न व औषध प्रशासनाच्या अधिकाऱ्यांनी संबंधितांवर कारवाई करण्यासाठी सर्व प्रक्रिया पूर्ण करायची. पाण्याचे नमुने, कंपनी तपासणी, तसेच जबाब, पाहणी अहवाल तयार करायचा. तो पाठवून त्या आधारे प्रकरण पुढे न्यायालयापर्यंत न्यायचे. परंतु, शेवटी बर्फ उत्पादकांवर कारवाई होण्याऐवजी ते सहीसलामत सुटायचे, ही बाब लक्षात घेऊन अन्न व औषध प्रशासनाच्या अधिकाऱ्यांनी या वेळी उलट प्रक्रिया केली. थेट कंपनी पाहणी न करता, छोटे व्यावसायिक जे कुल्फी तयार करण्यासाठी, बर्फाचा गोळा तयार करण्यासाठी, लिंबू सरबत, उसाचा रस यासाठी बर्फ घेऊन जातात. त्यांना हातगाडी घेऊन जाताना बर्फ कंपन्यांजवळच गाठले. कोठून बर्फ आणतात, याची माहिती घेतली. त्यांनी याच कंपन्यांमधून बर्फ आणत असल्याचे कबूल केले. त्यांचे जबाब घेतले. तसेच, अशा व्यावसायिकांना जागेवर जाऊन जे बर्फाचा पुरवठा करतात, त्या पुरवठादारांचा शोध घेतला. ते कोठून बर्फ आणतात, कोणाकोणाला वितरित करतात, याची माहिती घेतली. त्यांनतर पुढील कारवाईची प्रक्रिया केली आहे. कोणत्याही प्रकारे पळवाट शोधून हालचाल करता येणार नाही, अशा पद्धतीने कारवाईची प्रक्रिया झाली आहे. औद्योगिक वापराचा बर्फ खाण्याच्या पदार्थांसाठी मोठ्या प्रमाणावर विक्री करण्यात येत असताना आम्ही हा बर्फ खाण्याच्या पदार्थासाठी देत नाही, अशी दिशाभूल करणारे बर्फ उत्पादक कायद्याच्या कात्रीत अडकणार आहेत. (प्रतिनिधी)