पुणे : मंगळवारी (ता. ६) पहाटेच्या सुमारास सातारा-पुणे महामार्गावर भीषण अपघात झाला. हा अपघात जांभुळवाडी येथील दरी पुल याठिकाणी झाला. सातारा ते पुणे या दिशेने येताना एक मोठा ट्रेलर अपघात होऊन पलटी झाल्याने त्याचा चालक जखमी अवस्थेत अडकला होता.
घटनास्थळी मोठा ट्रेलर पलटी होऊन पुढील केबिनमधे सीटवर चालक जखमी अवस्थेत अडकला होता. तत्काळ घटनास्थळी अग्नीशमन दल दाखल झाले होते. तेथे गेल्यानंतर जवानांनी घटनेचे गांभीर्य ओळखून त्या चालकाशी संवाद साधून धीर देत अग्निशमनमधील जवान शिवाजी मुजूमले व शिवाजी आटोळे यांनी तातडीने दलाकडील स्प्रेडर व कटर हे उपकरण वापरत तसेच एका क्रेनच्या मदतीच्या साह्याने जखमी चालकाला पंधरा मिनिटात जखमी अवस्थेत बाहेर काढून लगेच उपचाराकरिता रुग्णवाहिकेतून रुग्णालयात रवाना केले.
परंतू रस्त्यावर पलटी झालेला ट्रेलर पाहून एक दुचाकीस्वार रस्त्यावरून जात असताना त्याने प्रथमदर्शनी प्रत्यक्ष हा अपघात पाहून मदतीकरिता पुढे आला. त्या ट्रेलरने काही प्रमाणात पेट घेत असल्याचे पाहताच त्या दुचाकीस्वाराने घाबरुन स्वतःचा बचाव करण्याकरिता दरीपुलावरुन खाली उडी मारली होती. नंतर काही वेळाने त्याच्या ओरडण्याचा आवाज ऐकल्यावर दलाचे जवान व तेथे उपस्थित नागरिक यांच्या मदतीने त्या दुचाकीस्वारास ही जखमी अवस्थेत वर काढण्यात आले.
या कामगिरीत सिंहगड अग्निशमन केंद्र अग्निशमन अधिकारी प्रभाकर उम्राटकर व वाहनचालक ज्ञानेश्वर बाठे तसेच तांडेल - शिवाजी मुजूमले व फायरमन शिवाजी आटोळे आणि मदतनीस दिगंबर वनवे, कल्पेश बानगुडे, राजेंद्र भिलारे यांनी सहभाग घेतला. तसेच पीएमआरडीए अग्निशमन दल यांचे जवान ही मदतीकरिता दाखल झाले होते. पोलिस विभाग व उपस्थित असणारे नागरिक यांची ही मदत झाली.