पुणे: शस्त्र परवान्यासाठी बनावट भाडेकरार केल्याप्रकरणात कोथरूड पोलिसांनी सुशील राजेंद्र हगवणे (वय २८, रा. पौड रोड, कोथरूड. भूकुम, ता. मुळशी) याला अटक केली. दरम्यान, पोलिसांनी त्याला न्यायालयात हजर केले. मात्र, तपास अधिका-यांनी जामीनपात्र कलमे लावून पोलिस कोठडीची मागणी केली . त्यावर न्यायालयाने आरोपीला न्यायालयीन कोठडी दिली. त्यानंतर न्यायालयाने आरोपीला जामीन मंजूर केला.
याबाबत पोलीस हवालदार मंगेश शिंदे यांनी फिर्याद दिली आहे. सरकारी पक्षातर्फे पल्लवी काशिद यांनी न्यायालयात बाजू मांडली. २९ जुलै २०२२ ते आतापर्यंतच्या कालावधीत हा प्रकार घडला. स्वत: राहत नसतानाही पौड रस्ता येथे राहत असल्याचा खोटा भाडेकरार करून शस्त्र परवान्यासाठी अर्ज केल्याचे फिर्यादीत म्हटले आहे. तो आत्महत्या केलेल्या वैष्णवी हगवणे यांचा दीर आहे. त्या प्रकरणात न्यायालयीन कोठडीत असताना न्यायालयाच्या परवानगीने त्याला अटक करण्यात आली. पोलिसांनी हगवणे याच्यावर कलम भारतीय दंड संहिता 177, 191, 192, 193, 417, 419 व शस्त्रास्त्र प्रतिबंध कायदा कलम 30, नियम 11 (8) अंतर्गत गुन्हा दाखल करण्यात आला आहे. मात्र, ही कलमे जामीनपात्र आहेत, तरीही तपास अधिका-यांनी आरोपीच्या पोलिस कोठडीची मागणी केली. त्याला आरोपीचे वकील अँड. स्वानंद गोविंदवार यांनी आक्षेप घेतला. न्यायालयाने आरोपीला न्यायालयीन कोठडी सुनावल्यानंतर आरोपीच्या वकिलांनी जामिनासाठी अर्ज केल्यानंतर आरोपीला जामीन मंजूर केला.