बारामती: शहर आणि तालुक्यात ५ एप्रिलपासून अत्यावश्यक सेवा वगळता सर्व दुकाने बंद करण्यात आली आहेत.त्यानंतर देखील कोरोनाचा आलेख दिवसेंदिवस वाढतच आहे.कोरोना रुग्णसंख्या कमी होण्याची कोणतीही चिन्हे नाहीत. त्यामुळे नागरिक चक्रावले आहेत.
बारामतीत शहरात सरासरी प्रतिदिन २५० रुग्ण आढळत आहेत.त्यामुळे दुकाने बंद करून १२ दिवस उलटले आहेत.एवढे दिवस व्यवसाय,दुकाने बंद ठेवुन देखील ही रुग्णसंख्या आटोक्यात येण्याची चिन्हे नाहीत. त्यामुळे ही संख्या घटणार कधी, बारामतीचे सुपर स्प्रेडर कोण, हा प्रश्न नागरिकांना सतावत आहे.
एप्रिल महिन्यात १७ दिवसांत आढळलेल्या कोरोनाबाधितांनी चार हजारांचा आकडा ओलांडला आहे. १७ दिवसांत शहर आणि तालुक्यात कोरोना बाधितांचा आकडा ४००१ झाला आहे.गतवर्षीच्या तुलनेने ही आकडेवारी कितीतरी अधिक आहे.
काही उदासीन नागरिकांसह काही कोविड रुग्णांमुळे कोरोना पसरत आहे. त्यातच रेमडेसिव्हीरचा तुटवडा दिवसेंदिवस गडद होत आहे. मागणीच्या प्रमाणात इंजेक्शनचा पुरवठा होत नसल्याचे वास्तव आहे. कोरोनाग्रस्तांची या इंजेक्शनसाठी धावाधाव सुरुच आहे. वाढत्या रुग्णसंख्येमुळे आरोग्य यंत्रणेवरील ताण वाढला आहे.खासगी रुग्णालयांची यंत्रणा देखील यास अपवाद नाही. प्रतिदिन येणारे सुमारे २५० रुग्णांना उपचार देण्याचे आव्हान प्रशासन आणि सामाजिक संस्थांसमोर आहे. नटराज नाट्य कला मंडळाने कोरोना रुग्णांना वेळेवर उपचार मिळण्यासाठी मोलाची भुमिका बजावली आहे.
दरम्यान, गेल्या २४ तासांत एकूण आरटीपीसीआर नमुने ५८७ तपासण्यात आले.त्यापैकी एकूण बारामतीमधील १५७ रुग्ण पॉझिटिव्ह आले आहेत.यामध्ये इतर तालुक्यातील पॉझिटिव्ह रुग्ण - २२आहेत. काल तालुक्यामध्ये खासगी प्रयोगशाळेत तपासणी केलेले एकूण आरटीपीसीआर त्यापैकी पॉझिटिव्ह -४८ आहेत. कालचे एकूण एंटीजन २३६. त्यापैकी एकूण पॉझिटिव्ह-१०२ आले आहेत. काल दिवसभरातील बारामतीतील एकूण पॉझिटिव्ह रुग्ण ३०७ आहेत.यामध्ये शहर-१५२ग्रामीण- १५५ रुग्णांचा समावेश असल्याचे तालुका आरोग्य अधिकारी डॉ. मनोज खोमणे यांनी सांगितले. आजपर्यंत बारामतीत एकूण रूग्णसंख्या-१३हजार ३१० वर पोहचली आहे.तर एकूण बरे झालेले रुग्ण- १०२९९ वर गेले आहेत.तर आजपर्यंत एकुण २०० जणांचा मृत्यु झाले आहेत.