पुणे : दारु पिण्यासाठी पैसे न दिल्याने एकाच्या डोक्यात दगड घालून खून केल्याची घटना उघडकीस आली आहे. खडक पोलिसांनी आरोपीला पकडले असून डोक्यात दगड घालून खून केलेल्या तरुणाची अद्याप ओळख पटलेली नाही. बाबासाहेब कुऱ्हाडे (वय ३५, रा़ हडपसर) असे अटक केलेल्या आरोपीचे नाव आहे. ही घटना मामलेदार कचेरीच्या जवळील फुटपाथवर पहाटे पावणे दोन वाजण्याच्या सुमारास घडली.
याबाबत खडक पोलीस ठाण्याचे वरिष्ठ पोलीस निरीक्षक भारत जाधव यांनी सांगितले की, बाबासाहेब कुऱ्हाडे याने काल रात्री एका तरुणाकडे दारू पिण्यासाठी पैसे मागितले होते. त्याने नकार दिल्याने त्यांच्यात वाद झाला. तेव्हा कुऱ्हाडे हा त्याच्यामागोमाग गेला व तो कोठे राहतो हे पाहिले, त्यानंतर हा तरुण मामलेदार कचेरी जवळील एका दुकानाच्या बाहेरील फुटपाथवर झोपला. पहाटे पावणे दोनच्या सुमारास कुऱ्हाडे हा तेथे आला व त्याने तेथील दगड उचलून त्या तरुणाच्या डोक्यात घातला. त्यात त्या तरुणाचा जागीच मृत्यु झाला. त्याच्या आरडाओरडाने आजूबाजूच्या लोकांनी पळून जाणाऱ्या कुऱ्हाडेला पकडून पोलिसांच्या ताब्यात दिले. मृत्यु झालेल्या तरुणाची अदयाप ओळख पटली नसून त्याच्या कपड्यांवरुन तो फिरस्ता असावा, असा पोलिसांना संशय आहे, खडक पोलीस अधिक तपास करीत आहेत.