सराईत चोरट्यांकडून वाहन, मोबाईलचोरीचे गुन्हे उघड

पुणे : चोरलेल्या गाड्या विक्रीचा प्रयत्न करणाऱ्या तिघांना दरोडा व वाहनचोरीविरोधी पथकाने अटक केली. त्यांच्याकडून वाहनचोरीचे ५ तर मोबाईलचोरीचे १० गुन्हे उघडकीस आले आहेत.

प्रशांत मधुकर भोसले (वय २०, रा. पालखी मार्ग, उरुळी देवाची), हसन इक्बाल शेख (वय २०, रा. पालखी मार्ग, उरुळी देवाची) आणि अभिषेक विलास पाडुळे (वय २१, रा. उरुळी देवाची) अशी अटक केलेल्यांची नावे आहेत.

दरोडा आणि वाहनचोरीविरोधी पथक हडपसर भागात पेट्रोलिंग करत असताना पोलीस अंमलदार शिवाजी जाधव आणि मनोज खरपुडे यांना दोघे जण जुगाडाच्या दोन गाड्या विकण्याच्या तयारीत आहेत. कोणी विकत घेत असेल तर सांगा, असे विचारत असल्याची माहिती मिळाली. त्यावरून सासवड रोडवरील काळेपडळ येथे पोलिसांनी सापळा रचून तिघांना पकडले. त्यांच्याकडे चौकशी केल्यावर त्यांनी आकाश याच्या सोबतीने चोरीचे गुन्हे केल्याचे सांगितले.

त्यांच्याकडून हडपसर, कोंढवा, यवत, लोणी काळभोर, अंबोली (मुंबई) या भागांतील वाहनचोरीचे ५ आणि मोबाईलचोरीचे २ गुन्हे उघडकीस आणले. त्यांच्याकडून १ लाख ८७ हजार रुपयांचा माल जप्त करण्यात आला आहे. याशिवाय त्यांच्याकडून आणखी ८ मोबाईल जप्त केले.

पोलीस निरीक्षक सुनील पंधरकर यांच्या मार्गदर्शनाखाली सहायक पोलीस निरीक्षक विवेक पाडवी, पोलीस उपनिरीक्षक गुंगा जगताप, पोलीस अंमलदार बुवा कांबळे, उदय काळभोर, दिनकर लोखंडे, राजेश अभंगे, विनायक रामाणे, मनोज शिंदे, राजेश लोखंडे, शिवाजी जाधव, मनोज खरपुडे, अमोल सरतापे, संभाजी गंगावणे यांनी ही कामगिरी केली.