वालचंदनगर (पुणे) :इंदापूर तालुक्यातील कळंब येथे चुलत भावानेच चुलत भावाचा कोयत्याने वार करून खून केल्याची दुर्दैवी घटना घडली आहे. हनुमंत सर्जेराव जाधव (३६) असे हत्या झालेल्याचे नाव आहे.याबाबत जाधव यांची पत्नी रेश्मा हनुमंत जाधव (२६) यांनी फिर्याद दिली आहे. पोलिसांनी याप्रकरणी दत्तात्रय हरिदास जाधव (३८) यास अटक केली आहे.
आरोपी दत्तात्रय जाधव आणि मयत हनुमंत जाधव यांची आई कमल जाधव यांच्यामध्ये २०१२ मध्ये मारामारी झाल्याची घटना घडली होती. याप्रकरणी पोलिस ठाण्यात जीवे मारण्याचा प्रयत्न केल्याप्रकरणी दत्तात्रय जाधव यांच्यावर गुन्हा दाखल करण्यात आला होता. मात्र, दोन्ही कुटुंबात समझोता होऊन भांडणे मिटविण्यात आले होते. या घटनेचा राग दत्तात्रय जाधव यांच्या मनात होता. त्यांंनी बुधवारी (दि. २३) सकाळी ७ वाजेच्या सुमारास हनुमंत जाधव शेतात विद्युत मोटर सुरू करण्यासाठी गेले होते. यावेळी दत्तात्रय जाधव याने पाठीमागून जाऊन हनुमंत जाधव यांच्या डोक्यावर पाठीवर हातावर वार करून जखमी केले.
तसेच शेतातील विहिरीत ढकलून पळून गेले. या घटनेची माहिती कुटुंबीयांना मिळताच त्यांना विहिरीतून काढून बारामतीत खासगी रुग्णालयात दाखल करण्यात आले. उपचार सुरू होण्यापूर्वीच त्यांचा ९.४५ च्या सुमारास मृत्यू झाला. खुनानंतर आरोपी दत्तात्रय जाधव हा पळून जाऊन उसामध्ये लपला. पोलिसांनी त्याला शिताफीने अटक केली. पुढील तपास पोलिस निरीक्षक विक्रम साळुंखे करीत आहेत.