सिरमचे ‘कोव्हिशिल्ड’ नाव बदलण्यााठीचा वाद कोर्टात

लोकमत न्यूज नेटवर्क

पुणे : ‘कोव्हिशिल्ड’ या ट्रेडमार्कचा वापर करण्यास आम्ही आधी सुरुवात केली आहे, असे सांगून नांदेड येथील ‘क्युटिस बायोटेक’ कंपनीने सिरम इन्स्टिट्यूट ऑफ इंडिया उत्पादीत करीत असलेल्या लशीवर आक्षेप घेतला आहे. सिरमने लस विकसित करावी मात्र या ट्रेडमार्कने नाही, अशी मागणी करणारा दावा कंपनीने जिल्हा न्यायालयात दाखल केला आहे.

‘क्युटिस’ने हा दावा दाखल केल्यानंतर अतिरिक्त सत्र न्यायाधीश ए. व्ही. रोटे यांनी ‘सिरम’ला नोटीस दिली आहे. ‘ट्रेडमार्क वापरण्याबाबत हरकत घेतल्याने याबाबत मनाई आदेश का देऊ नये? यावर तुमचे म्हणणे मांडा,’ असे नोटिसीत म्हटले आहे. या प्रकरणाची पुढील सुनावणी १९ जानेवारीला होणार आहे.

“आम्ही २९ एप्रिल २०२० रोजी ‘कोव्हिशिल्ड’ या ट्रेडमार्कसाठी रजिस्टर कार्यालयाकडे अर्ज केला होता. ‘सिरम’ने ३ जून २०२० रोजी अर्ज केला. ‘ट्रेडमार्क’साठी अर्ज केल्यानंतर आम्ही कोरोना काळात हॅण्ड सॅनिटायझरसारखी उत्पादने ३० मे पासून बनवायला व त्याची विक्री करण्यास सुरुवात केली आहे. ही सर्व उत्पादने ‘कोव्हिशिल्ड’ या ट्रेडमार्कखाली उत्पादित व विक्री केली जात आहेत. आता ‘सिरम’ने त्यांची लस ‘कोव्हिशिल्ड’ या नावाने बाजारात आणण्याची तयारी केल्याने ट्रेडर्स आमची उत्पादने परत पाठवित आहेत आणि विक्रीस नकार नकार देत आहेत. त्यामुळे कंपनीला आर्थिक फटका बसू लागला आहे. यामुळे ‘सिरम’ने त्यांच्या लशीचे नाव बदलावे, अशी मागणी या दाव्यात करण्यात आली आहे. ‘क्युटिस’ने ही याचिका दाखल केली आहे.

दरम्यान, नांदेडच्या जिल्हा न्यायालयात यापूर्वी सिरमविरुद्ध दावा दाखल करण्यात आला होता. मात्र या ठिकाणी तो दाखल करणे योग्य होणार नाही म्हणून पुण्याच्या जिल्हा न्यायालयात नव्याने दावा दाखल करण्यात आला आहे. ‘कोव्हिशिल्ड’ या ट्रेडमार्कचा वापर आम्ही आधी सुरू केला. ‘सिरम’ने ‘कोव्हिशिल्ड’ या ट्रेडमार्कचा वापर करून लस बाजारात आणली तर त्यातून होणारा नफा ‘क्युटीस’ला द्यावा, असे ‘क्युटिस’चे वकील आदित्य सोनी यांनी ‘लोकमत’ला सांगितले.

चौकट

कोव्हिशिल्ड हा ट्रेडमार्क मिळण्यासाठी ‘क्युटिस बायोटिक’ आणि ‘सिरम’ या दोन्ही कंपन्यांनी अर्ज केला आहे. मात्र अद्याप कोणत्याही कंपनीला हा ट्रेडमार्क देण्यात आलेला नसून, त्यांचे अर्ज प्रलंबित आहेत. दरम्यानच्या काळात दोन्ही कंपन्यांनी आपली उत्पादने ‘कोव्हिशिल्ड’ या नावाने उत्पादित करण्यास सुरुवात केली असल्याची माहिती तज्ज्ञांनी दिली.