पुणे/किरण शिंदे : पुण्यातील मार्केटयार्ड पोलीस स्टेशनच्या हद्दीतून एक धक्कादायक प्रकार उघडकीस आला आहे. मारण्याची आणि कॉलेज बंद करण्याची धमकी देऊन एका अल्पवयीन महाविद्यालयीन विद्यार्थिनीवर वारंवार बलात्कार करण्यात आलाय. पीडित तरुणीने दिलेल्या तक्रारीनंतर आरोपी तरुणावर मार्केट यार्ड पोलीस ठाण्यात गुन्हा दाखल करण्यात आला आहे.
अभिजीत दिलीप पापळ (वय 21, पुणे अप्पर इंदिरानगर बिबवेवाडी पुणे) असे गुन्हा दाखल करण्यात आलेल्या आरोपीचे नाव आहे. त्याला अटकही करण्यात आली. भादवि कलम 376 (2), (के) (एन), 354 (ड) व बालकांच्या लैंगिक अपराधापासून संरक्षण अधिनियम कलम चार-आठ व 14 अन्वये गुन्हा दाखल करण्यात आला आहे.
या प्रकरणी अधिक माहिती अशी की, तरुणी मार्केटयार्ड परिसरात राहण्यासाठी असून ती एका महाविद्यालयात शिक्षण घेते. तर ती महाविद्यालयात जात असताना बस स्थानकावर तिची आणि आरोपीची ओळख झाली होती. याच ओळखीचा गैरफायदा घेऊन आरोपीने मारण्याची आणि कॉलेज बंद करण्याची धमकी देऊन डिसेंबर 2022 ते फेब्रुवारी 2023 या कालावधीत वेळोवेळी बलात्कार केला. भुगाव येथील सनी लॉज या ठिकाणी घेऊन जात तिच्या इच्छेविरुद्ध लैंगिक संबंध ठेवले.
दरम्यान या प्रकाराविषयी कोणाला काही सांगितल्यास आरोपीने तरुणीला ठार मारण्याची धमकी दिली होती. त्यामुळे तरुणी पोलीस ठाण्यात तक्रार देण्यास घाबरत होती. दरम्यान तक्रार आल्यानंतर पोलिसांनी या प्रकरणी गुन्हा दाखल करून आरोपी तरुणाला अटक केली आहे. मार्केटयार्ड पोलीस अधिक तपास करत आहेत.