चाकण नगरपरिषद निवडणूक : राष्ट्रवादी आणि शिवसेनेचा विजय दावा; मात्र होणार ‘कांटे की टक्कर’

राष्ट्रवादी काँग्रेस (अजित पवार गट) आणि शिवसेना (एकनाथ शिंदे गट) या दोन्ही प्रमुख पक्षांनी विजयी होण्याचा ठाम दावा केल्याने निवडणूक ‘कांटे की टक्कर’ होणार, अशी चिन्हे स्पष्ट दिसत आहे

चाकण : चाकण नगरपरिषद निवडणुकीत राजकीय वातावरण चांगलेच तापले असून, राष्ट्रवादी काँग्रेस (अजित पवार गट) आणि शिवसेना (एकनाथ शिंदे गट) या दोन्ही प्रमुख पक्षांनी विजयी होण्याचा ठाम दावा केल्याने निवडणूक ‘कांटे की टक्कर’ होणार, अशी चिन्हे स्पष्ट दिसत आहेत. परंतु, भाजप आणि काँग्रेस पक्षांनीसुद्धा कंबर कसली आहे. मात्र, मतदार कोणाला पसंती देणार हे लवकरच कळणार आहे.

चाकण नगरपरिषदेच्या सार्वत्रिक निवडणुकीच्या पार्श्वभूमीवर स्थानिक पातळीवर मतदारांपर्यंत पोहोचण्यासाठी सर्वच पक्षांचा जोरदार प्रचार सुरू असून, प्रत्येक गल्लीत-प्रत्येक बूथवर उमेदवारांकडून जोरदार शक्तिप्रदर्शन केले जात आहे. राष्ट्रवादी काँग्रेस आणि शिवसेना या दोन प्रमुख पक्षात लढत होत आहे. परंतु, भाजपने नगराध्यक्ष पदासह बारा प्रभागात उमेदवार उभे केले आहेत. भाजप आणि काँग्रेस पक्षाची शहरात ताकत कमी असली तरी त्यांना कमी लेखून चालणार नाही, कारण विजयी उमेदवारांना याचा फटका बसू शकतो.

राष्ट्रवादीकडून विकासकामांचा मुद्दा पुढे केला जात असून, चाकणच्या सर्वांगीण प्रगतीचा मार्ग आम्हीच दाखवला असल्याचा दावा केला आहे. भविष्यात राज्य सरकारच्या माध्यमातून शहरातील पाणी पुरवठा, वाहतूक कोंडी, कचरा व्यवस्थापन यावर धोरणात्मक काम करणार असल्याची ग्वाही दिली जात आहे, तर शिंदेसेनेने आजवर राबवलेल्या विविध योजनांचा दाखला देत राज्य सरकारच्या पाठबळामुळे शहरात कोट्यवधी रुपयांची मोठी विकासकामे आम्ही केली असून पुढील काळातही चाकणला स्वच्छ - सुंदर चाकण करण्याचा नारा दिला आहे.

मतदार मात्र शांतपणे दोन्ही पक्षांचे प्रचार, भूमिका आणि उमेदवारांचा स्वभाव जाणून घेत आहेत. निवडणुकीच्या तोंडावर वाढलेल्या राजकीय आरोप-प्रत्यारोपांमुळे उत्सुकता शिगेला पोहोचली असून, अखेरचा क्षणापर्यंत समीकरणे पालटण्याची शक्यता नाकारता येत नाही. शहरातील विकासाचे वादे सर्वच राजकीय पक्षांनी केले असले तरी तसा जाहीरनामा प्रसिद्ध केलेला नाही. यामुळे चाकण नगरपरिषद निवडणूक यंदा दोन्ही प्रमुख पक्षांमध्ये थरारक होत असून, कोण बाजी मारणार याकडे सर्वांचे लक्ष लागून राहिले आहे.

पक्षीय पातळीवर प्रचारात भावनिक सूर -

पक्षनिष्ठा, जुने कार्यकर्ते, घराणेशाहीचे भांडवल, ''आपल्यावर केलेली उपकाराची आठवण’ अशा संदेशांनी मतदारांना भावनिकरीत्या बांधून ठेवण्याचा प्रयत्न केला जात आहे. परंतु, दुसरीकडे तरुण मतदार, कामधंद्यासाठी चाकणमध्ये स्थायिक झालेले नागरिक आणि प्रथमच मतदान करणाऱ्या मतदारवर्गात विकासाची भाषा अधिक परिणामकारक

 दोन्ही शिवसेना एकत्र -

उद्धवसेनेकडून शिंदेसेनेला पाठिंबा -

उद्धवसेनेने अधिकृतपणे शिंदेसेनेला पाठिंबा जाहीर केला असून, संगनमताने उमेदवार दिल्याने स्थानिक पातळीवर दोन्ही गटांमध्ये एकीचे चित्र आहे.

 राष्ट्रवादी काँग्रेसची मजबूत तयारी -

राष्ट्रवादी काँग्रेस पक्ष निवडणुकीसाठी सज्ज असून, चाकणचे माजी उपसरपंच यांच्या सुनेला नगराध्यक्षा पदाची उमेदवार म्हणून उभे केले आहे. राजकीय अनुभव, स्थानिक प्रश्नांची जाण आणि संघटनात्मक बळाच्या जोरावर राष्ट्रवादी काँग्रेसकडून जोरदार तयारी सुरू आहे.

राष्ट्रीय काँग्रेसचा अस्तित्व दाखवण्याचा प्रयत्न -

भारतीय राष्ट्रीय काँग्रेस पक्षाने या निवडणुकीत नगराध्यक्षा पदासह एका प्रभागात उमेदवार उभा करून अस्तित्व दाखविण्याचा प्रयत्न केला आहे. पारंपरिक मतदारांवर विसंबून काँग्रेसकडून जोरदार प्रचार मोहीम सुरू आहे.भारतीय जनता पक्षाची आक्रमक मोहीम

भारतीय जनता पक्षाने मागील काळात शहरात राबवलेल्या संघटन कौशल्यावर नगराध्यक्षा आणि नगरसेवक पदासाठी काही प्रभागात स्वतःचे उमेदवार उभे केले आहेत. स्थानिक नेतृत्व आणि संघटनाच्या आधारावर भाजप निवडणुकीत प्रभाव दाखवण्याच्या तयारीत आहे.