पुणे : मैत्रिणीमार्फत तरुणीला भांडण मिटविण्यासाठी बोलावून तिला मारहाण करुन तिचा विनयभंग केल्याचा प्रकार समोर आला आहे. मैत्रीस नकार दिल्याच्या कारणातून तरुणाने तिला मारहाण केली.
याप्रकरणी, प्रशांत सुडके (वय.22) या तरुणाच्या विरुद्ध विमानतळ पोलिसांनी गुन्हा दाखल केला आहे. याबाबत वडगांवशेरी येथील 21 वर्षीय तरुणीने फिर्याद दिली आहे. ही घटना ४ मार्च रोजी दुपारी बारा वाजताच्या सुमारास विमाननगर परिसरात घडली आहे.
पोलिसांनी दिलेल्या माहितीनुसार, आरोपी प्रशांत याने फिर्यादी तरुणीसोबत मैत्री करण्याचा प्रयत्न केला. मात्र तरुणीने त्याला विरोध केला. दरम्यान तरुणीने हा प्रकार घरच्यांना सांगितला. तिच्या वडिलांनी याबाबत आरोपीला जाब विचारला असता, त्यांच्यात वाद झाला. त्यानंतर आरोपीने फिर्यादी तरुणीच्या एका मैत्रिणीला फोन करून वाद मिटवायचे असल्याचे सांगितले. विमानगर परिसरात बोलावून घेतल्यानंतर आरोपीने फिर्यादी तरुणीला शिवीगाळ केली. डोक्याचे केस पकडून हाताने मारहाण केली. तरुणीने विरोध केला असता, मारहाण करून तिच्या मनास लज्जा उत्पन्न होईल असे वर्तन आरोपीने केले. या प्रकारात तरुणीच्या कानातील सोन्याचा झुमका पडून गहाणझाल्याचे फिर्यादीत म्हटले आहे. याप्रकरणाचा पुढील तपास पोलीस उपनिरीक्षक शेवाळे करत आहेत.