चाकण (पुणे) : पुढे चाललेल्या वाहनाला मागे टाकण्याच्या प्रयत्नात पुढील दुचाकीस पाठीमागून भरधाव कंटेनरची धडक बसल्याने विचित्र अपघात घडला. यात दुचाकीस्वार जागीच ठार झाला. हा अपघात चाकण-शिक्रापूर रस्त्यावरील शेलपिंपळगावनजीक साबळेवाडी ( ता. खेड ) गावच्या हद्दीत शनिवारी ( दि. १८ ) सकाळी अकरा वाजदरम्यान झाला. चाकण पोलिसांनी याप्रकरणी रविवारी ( दि. १९ ) कंटेनर चालकावर सदोष मनुष्यवधाचा गुन्हा दाखल केला आहे.
सुभाष दत्तात्रय साळुंके ( वय ५४, रा. बहुळ, ता. खेड ) असे ठार झालेल्या दुचाकीस्वाराचे नाव आहे. दशरथ रामभाऊ वाडेकर ( वय - ५८, रा. फुलसुंदर वस्ती, सिद्धेगव्हाण, ता. खेड ) यांनी याप्रकरणी चाकण पोलिस ठाण्यात फिर्याद दिली. अधिक माहिती अशी की, सुभाष साळुंके व त्यांचा मित्र दशरथ वाडेकर हे एकाच दुचाकी ( क्र. एमएच १४, जेबी. २८०७ ) वरून शनिवारी सकाळी अकरा वाजेदरम्यान चाकण-शिक्रापूर रस्त्याने जात होते. त्यावेळी त्यांच्या पाठीमागून भरधाव आलेल्या कंटेनरची ( क्र. एमएच १५, सीके २८५० ) त्यांच्या दुचाकीला पाठीमागून जोराची धडक बसली. त्यावेळी झालेल्या अपघातात दुचाकीवरील सुभाष साळुंके हे ठार झाले. अधिक तपास महिला पोलिस उपनिरीक्षक प्रियांका साळुंके करीत आहेत.