धायरी : वाढदिवसाची पार्टी सुरू असताना एकाने फक्त बघितले म्हणून त्याला पाच जणांनी लाथाबुक्क्यांनी जबर मारहाण केली. यात गणपतसिंह मेरावी (वय: ३८ वर्षे, रा. लेबर कॅम्प धायरीपुणे, मूळ: मध्यप्रदेश) हा गंभीर जखमी झाला आहे. ही घटना रविवारी सायंकाळी साडेसहा वाजण्याच्या सुमारास धायरी येथील डी.एस.के. स्कुलजवळ घडली. याप्रकरणी जखमीचा मित्र सुकलसिंह मसराम (वय ३५ वर्षे रा. लेबर कॅम्प, धायरी, पुणे) यांनी तक्रार दिल्याने पाच जणांविरुद्ध सिंहगड रस्ता पोलीस ठाण्यात गुन्हा दाखल करण्यात आला आहे.
याबाबत मिळालेली माहिती अशी की, सिंहगड रस्ता परिसरातील धायरी येथील डी.एस.के. स्कुलजवळ असणाऱ्या पत्र्याचे शेडमध्ये लेबर कॅम्प आहे. त्याठिकाणी काही मध्यप्रदेश भागातील कामगार राहतात. ते सर्वजण सेंट्रिंगची कामे करतात. लेबर कॅम्पपासून पाचशे मीटर अंतरावर सनी चव्हाण याचा वाढदिवस करण्यासाठी तेथे त्याचे काही मित्र जमले होते. यावेळी गणपतसिंह मेरावी याने त्यांच्याकडे बघितले म्हणून त्याला पाच जणांनी मिळून ठार मारण्याच्या उद्देशाने लाथाबुक्क्यांनी जबर मारहाण केली. यात तो गंभीर जखमी होऊन जागीच बेशुद्ध पडला. दरम्यान तो निपचित पडल्याचे पाहून या पाच जणांनी तेथून धूम ठोकली. याबाबत सिंहगड रस्ता पोलिसांना माहिती मिळताच त्यांनी घटनास्थळी जाऊन पाहणी केली. जखमी गणपतसिंह मेरावी याच्यावर रुग्णालयात उपचार चालू असून अद्यापही तो शुद्धीवर आला नसल्याची माहिती मिळते आहे. या घटनेत पोलिसांनी पाच जणांविरुद्ध गुन्हा दाखल केला असून आरोपींच्या शोधार्थ पथके रवाना झाली आहेत. पुढील तपास सिंहगड रस्ता पोलीस ठाण्याचे सहायक पोलिस निरीक्षक भरत चंदनशिव करीत आहेत.