मधमाशांच्या पोळामुळे बनेश्वर भक्तांना त्रास; ट्रस्टची वनविभागाकडे तक्रार

श्री क्षेत्र बनेश्वर परिसरातील पार्किंगमधील झाडांवर असंख्य मधमाशांचे पोळ झाले आहेत.

नसरापूर : श्री बनेश्वर महादेव देवस्थान ट्रस्टने वनविभागाकडे मधमाशांच्या पोळांमुळे होणाऱ्या त्रासाबाबत तक्रार नोंदवली आहे. बनेश्वर क्षेत्रातील पार्किंग भागातील झाडांवर मधमाश्यांची मोठे पोळ तयार झाले असून, यामुळे भाविक आणि नागरिकांना चावण्याचा धोका वाढला आहे. ट्रस्टने नसरापूर येथील वनपरिक्षेत्र अधिकाऱ्यांना पत्र लिहून त्वरित उपाय करण्याची विनंती केली आहे.

ट्रस्टकडून पाठवलेल्या पत्रात नमूद केल्याप्रमाणे, श्री क्षेत्र बनेश्वर परिसरातील पार्किंगमधील झाडांवर असंख्य मधमाशांचे पोळ झाले आहेत. येणाऱ्या जाणाऱ्या नागरिक आणि भाविकांना मधमाशा चावत असल्याने त्यांना नाहक त्रास होत आहे. ‘कोणत्याही प्रकारची गंभीर घटना घडू नये यासाठी त्वरित उपाय करण्यात यावेत,’ अशी स्पष्ट विनंती ट्रस्टने केली आहे. पत्राची प्रत नसरापूर येथील वनविभागाचे वनपरिक्षेत्र अधिकाऱ्यांना प्रत्यक्ष देण्यात आली आहे.

बनेश्वर महादेवाचे दर्शन घेण्यासाठी दररोज अनेक भाविक येतात. पार्किंग भागातच मधमाश्यांची पोळ असल्याने वाहने उभी करणे धोकादायक झाले आहे. स्थानिक रहिवासी कैलास यांनी सांगितले, ‘झाडाखाली उभे राहिल्यावर मधमाशा हल्ला करतात. लहान मुले आणि वृद्ध भाविकांना विशेष धोका आहे. वनविभागाने योग्य पावले उचलली पाहिजेत.’ अशीच खंत अनेकांनी व्यक्त केली आहे.

मधमाशी संरक्षित प्राणी असल्याने त्यांचे पोळ काढणे कायद्याने बंधनकारक आहे. वनविभागाकडून विशेष तज्ज्ञ मधमाश्यांना सुरक्षितरित्या हलविण्याचे काम केले जाते. ट्रस्टने वनपरिक्षेत्र अधिकाऱ्यांकडे तक्रार केल्याने लवकरच पाहणी करून आणि उपाययोजना होईल, अशी अपेक्षा आहे. यापूर्वीही अशा प्रकारच्या तक्रारींवर वनविभागाने तातडीने कारवाई केली आहे. ट्रस्टकडून घेतलेल्या या पुढाकारामुळे स्थानिक भाविकांमध्ये समाधान व्यक्त होत आहे. भोर तालुक्यातील धार्मिक पर्यटनाला चालना मिळावी यासाठी अशा समस्या तत्काळ सोडवाव्यात, अशी मागणी होत आहे.