पुणे : घरी जात असलेल्या तृतीयपंथीयाला अडवून आपल्याबरोबर येण्याची गळ चौघांनी घातली. त्याला या तृतीयपंथीयाने नकार दिल्यावर त्याच्यावर कोयत्याने वार करुन जीवे मारण्याचा प्रयत्न करण्यात आला.
याप्रकरणी हडपसरमधील वैदुवाडी येथे राहणाऱ्या एका २२ वर्षाच्या तृतीयपंथीयाने हडपसर पोलीस ठाण्यात फिर्याद दिली आहे. पोलिसांनी खुनाचा प्रयत्न केल्याचा गुन्हा दाखल केला आहे. हा प्रकार हडपसरमधील कात्रज मंतरवाडी रोडवरील इंदु स्टील कंपनीजवळ १२ जुलै रोजी रात्री दहा वाजता घडला.
याबाबत पोलिसांनी दिलेल्या माहितीनुसार, फिर्यादी हा तृतीयपंथी असून तो रात्री घरी जात होता. त्यावेळी चौघांनी त्यांना अडवून त्यांच्याबरोबर जाण्याचा आग्रह करु लागले. त्याला फिर्यादी यांनी नकार दिला. तेव्हा त्यांनी हाताने मारहाण केली. त्यांच्या एकाने कोयत्याने मानेवर वार केला. फिर्यादी यांनी हात आडवा घातला असता हाताला गंभीर दुखापत झाली. त्यानंतर गंभीर जखमी झालेल्या फिर्यादी यांनी हॉस्पिटलमध्ये उपचार घेतल्यानंतर पोलिसांकडे तक्रार दिली आहे. गुन्हे शाखेचे युनिट ५ चे पथक, खंडणी विरोधी पथक तसेच हडपसर पोलिसांचे पथक या चोरट्यांचा शोध घेत आहेत. पोलीस उपनिरीक्षक दीपक खेडकर तपास करीत आहेत.