पुणे : जादूटोणा करण्याच्या संशयावरून ज्येष्ठ नागरिकावर तीक्ष्ण शस्त्राने वार करण्यात आले. ज्येष्ठाच्या खुनाचा कट रचून दोन लाख रुपयांची सुपारीदेखील देण्यात आल्याचा प्रकार सहकारनगर पोलिसांनी उघडकीस आणला आहे. याप्रकरणी पोलिसांनी तिघांना अटक केली.
सागर सतीश कुंभार (४१), तौरस बाळू कारले (४३, दोघे रा. सुपर इंदिरानगर, बिबवेवाडी) आणि सागर शशिकांत सोनार (३२, रा. मोरे वस्ती, रांका ज्वेलर्समागे, पद्मावती) अशी अटक करण्यात आलेल्या आरोपींची नावे आहेत. १५ जून रोजी पद्मावती परिसरात सोनू पांडू होडे (६७, रा. मोरे वस्ती, रांका ज्वेलर्समागे, पद्मावती) यांच्यावर तीक्ष्ण शस्त्राने वार करण्यात आले. होडे यांच्या गळ्यावर वार करण्यात आल्याने ते गंभीर जखमी झाले होते. पदपथावर होडे गंभीर जखमी अवस्थेत पडले होते. याप्रकरणी सहकारनगर पोलिस ठाण्यात गुन्हा दाखल करण्यात आला होता. होडे यांच्या खुनाचा प्रयत्न का करण्यात आला, याबाबतची पोलिसांना मिळाली नव्हती.
दरम्यान, पोलिस तपासात होडे यांच्यावर हल्ला करणारा आरोपी सागर कुंभार सुपर इंदिरानगर परिसरात वास्तव्यास असल्याची माहिती तपास पथकातील पोलिस हवालदार अमोल पवार, किरण कांबळे, अमित पदमाळे यांना मिळाली. त्यानंतर पोलिसांनी कुंभारला ताब्यात घेतले. चौकशीत आरोपी सागर सोनार याच्या सांगण्यावरून होडे यांच्यावर हल्ला करण्यात आल्याची कबुली कुंभारने दिली. होडे यांचा खून करण्यासाठी सोनारने दोन लाख रुपयांची सुपारी दिल्याची माहिती कुंभारने तपासात दिली. पोलिसांच्या पथकाने कुंभार, त्याचा साथीदार कारले आणि सोनारला ताब्यात घेतले. होडे जादूटोणा, भानामती, करणीसारखे प्रकार करत असून, त्यांनी आमचे घर बळाकावण्याचा प्रयत्न केला. होडे यांचा खून करण्यासाठी दोन लाख रुपयांची सुपारी कारले आणि कुंभार यांना सोनारने दिल्याचे तपासात निष्पन्न झाले.
सहायक पोलिस आयुक्त नंदिनी वग्याणी - पराजे यांच्या मार्गदर्शनाखाली वरिष्ठ पोलिस निरीक्षक सुरेंद्र माळाळे, गुन्हे शाखेचे निरीक्षक उत्तम भजनावळे, उपनिरीक्षक युवराज पोठरे, बापू खुटवड, अमोल पवार, किरण कांबळे, अमित पदमाळे, बजरंग पवार, विनोद जाधव, महेश मंडलिक, नवनाथ शिंदे, अमित सुतकर, सागर कुंभार आणि विशाल वाघ यांनी ही कारवाई केली.