सहायक विक्रीकर आयुक्ताकडे घबाड

व्यावसायिकाच्या थकीत व्यवसाय करात तडजोड करण्यासाठी १३ लाखांची लाच घेताना एसीबीने रंगेहात पकडलेल्या सहायक विक्रीकर आयुक्त सोमनाथ मधुकर नलावडे

पुणे : व्यावसायिकाच्या थकीत व्यवसाय करात तडजोड करण्यासाठी १३ लाखांची लाच घेताना एसीबीने रंगेहात पकडलेल्या सहायक विक्रीकर आयुक्त सोमनाथ मधुकर नलावडे याच्या घराची किंमत दोन कोटी रुपये असून, बँकेच्या डेक्कन जिमखाना येथील लॉकरमध्ये तब्बल १ किलो ५६ ग्रॅम सोन्याचे दागिने, ३ किलो चांदी मिळाल्याची माहिती अधीक्षक शिरीष सरदेशपांडे यांनी दिली.
सोमनाथ मधुकर नलावडे (वय ४0, रा. भोसलेनगर, गणेशखिंड रस्ता) याच्यासह त्याचा खासगी नोकर शिवाजी कृष्णा गुजर (वय ४२) याला एसीबीने मंगळवारी संध्याकाळी त्याच्या राहत्या घरातून अटक केली. पुण्यातील एका व्यावसायिकाचा सुमारे १ कोटी ६0 लाख रुपयांचा कर थकला होता. या करात तडजोड करून २३ लाख रुपये द्यावेत, अशी मागणी त्याने केली होती. तर, करापोटी केवळ तीन लाख भरण्यास सांगण्यात आले होते. या तडजोडीतील पहिला हप्ता म्हणून १३ लाख रुपये देण्याचे संबंधित व्यावसायिकाने मान्य केले. त्यानंतर त्यांनी लाचलुचपत प्रतिबंधक विभागाकडे तक्रार केली. मंगळवारी सायंकाळी साडेसातच्या सुमारास नलावडे याने व्यावसायिकाला १३ लाख रुपये घेऊन घरी बोलावले. लाचलुचपत प्रतिबंधक विभागाने सापळा रचून व्यावसायिकाकडून १३ लाख रुपये घेत असताना या पथकाने त्याला रंगेहाथ पकडले.
त्याच्या राहत्या घराची किंमत २ कोटी रुपये असून घरामध्ये १४ तोळे वापरते सोने, अंतर्गत साजवटीची किंमत सहा लाख अशी एकूण २ कोटी २४ लाख ९६ हजारांची मालमत्ता आढळून आली. न्यायालयाने या दोघांना ३० आॅक्टोबरपर्यंत पोलीस कोठडी सुनावली.