पुणे : नाना पेठेतील आंदेकर चौकात महापालिकेची परवानगी न घेता "माजी लोकप्रिय नगरसेवक स्वर्गीय उदयकांतजी आंदेकर चौक" असा नामफलक उभा करून त्याला बेकायदेशीरपणे वीज जोड केल्याप्रकरणी समर्थ पोलिसांनी शिवम उदयकांत आंदेकर व त्याच्या साथीदारांवर गुन्हा दाखल केला आहे.
नानापेठेतील डोके तालीम जवळ १ जानेवारी रोजी एक आठ वर्षांची मुलगी घराजवळ खेळत होती. खेळत असताना येथील "माजी लोकप्रिय नगरसेवक स्वर्गीय उदयकांतजी आंदेकर चौक" नावाच्या फलकाला स्पर्श झाल्यानंतर तिला विजेचा धक्का लागला. यामध्ये तिचा मृत्यू झाला. ससुन हॉस्पिटलने शवविच्छेदन करून तिचा मृत्यू विजेच्या धक्क्याने झाल्याचा अहवाल दिला. यानंतर समर्थ पोलिसांनी आकस्मित मृत्यू म्हणून नोंद केली होती.
मात्र, अधिक तपासामध्ये पोलिसांना येथील "माजी लोकप्रिय नगरसेवक स्वर्गीय उदयकांतजी आंदेकर चौक" नावाचा लोखंडी नामफलक महापालिकेची परवानगी न घेता शिवम देकर, रा. नानापेठ व त्याच्या साथीदारांनी उभारला. तसेच या फलकाला फूटपाथवरील विजेच्या खांबामधून बेकायदेशीरपणे वीज जोड केल्याचे निष्पन्न झाले. याच ठिकाणी विजेचा धक्का लागून आठ वर्षांच्या मुलीचा मृत्यू झाला. तसेच ११ वर्षांचा एक मुलगा जखमी झाल्याने पोलिसांनी शिवम आंदेकर व त्याच्या इतर साथीदारांवर भारतीय विद्युत कायदा कलम १३५ प्रमाणे गुन्हा दाखल केला आहे. दरम्यान, शिवम आंदेकर व त्याच्या साथीदारांवर नुकताच खंडणीचा गुन्हा दाखल होऊन त्याला अटक केली. त्यानंतर आता त्याच्यावर दुसरा गुन्हा दाखल झाला आहे.