पुणे : ओळखीच्या असलेल्या महिलेने एका १९ वर्षीय मुलीला वडापाव खायला देण्याच्या बहाण्याने घरी नेले. तरुणीला घरात सोडून महिला बाहेरून दाराची कडी लावून निघून गेली. यावेळी घरातच असलेल्या महिलेच्या पतीने तरुणीवर जबरदस्तीने शारीरिक संबंध ठेवले. हा प्रकार बुधवारी (दि. ३) दुपारी दोन ते रात्री साडेअकराच्या सुमारास कात्रज परिसरात घडला. याप्रकरणी भारती विद्यापीठ पोलिसांनी संबंधित दाम्पत्यावर गुन्हा दाखल केला आहे.
याबाबत पीडित १९ वर्षीय मुलीने शुक्रवारी (दि. ५) भारती विद्यापीठ पोलिस ठाण्यात फिर्याद दिली आहे. यावरून प्रल्हाद सखाराम साळुंके (४८, रा. कात्रज) व त्याच्या पत्नीवर (४५) बलात्कार केल्याप्रकरणी गुन्हा दाखल केला आहे.
पोलिसांनी दिलेल्या माहितीनुसार, पीडित तरुणी बुधवारी दुपारी दोनच्या सुमारास भाजी मंडई येथे पायी चालत जात होती. त्यावेळी तिच्या ओळखीची आरोपी महिला भेटली. महिलेने तरुणीला गोड बोलून तिच्या राहत्या घरी घेऊन गेली. तरुणीला वडापाव देण्याचा बहाणा करुन तिला एकटीला घरात ठेवून बाहेर निघून गेली. महिलेने घराच्या दरवाजाला बाहेरून कडी लावली. तरुणी घरात एकटी असल्याचे पाहून महिलेच्या पतीने तिच्यासोबत जवळीक साधण्याचा प्रयत्न करुन तिच्यावर जबरदस्तीने लैंगिक अत्याचार केले. पतीच्या या कृत्याला त्याच्या पत्नीने मदत केल्याचे फिर्यादीत म्हटले आहे. या प्रकरणाचा पुढील तपास पोलिस उपनिरीक्षक प्रियंका निकम करत आहेत.