Ambegaon Vidhan Sabha Election Result 2024 Live : आंबेगाव विधानसभा मतदार संघाच्या अटीतटीच्या लढतीत सहकारमंत्री दिलीप वळसे पाटील यांचा निसटता विजय मिळविला आहे. त्यांनी महाविकास आघाडीचे उमेदवार देवदत्त निकम यांचा 1523 मतांनी पराभव केला आहे.
विधानसभेची ही निवडणूक अत्यंत चुरशीची झाली असून पहिल्या फेरीपासून शेवटच्या फेरीपर्यंत मताधिक्यात चढ-उतार होत होता. शेवटच्या विसाव्या फेरीत निकाल निश्चित होऊन सहकारमंत्री दिलीप वळसे पाटील 1523 मतांनी विजयी झाले आहेत. एकूण 2 लाख 22 हजार 515 मतांपैकी वळसे पाटील यांना 1 लाख 6 हजार 888 मते मिळाली. तर त्यांचे प्रतिस्पर्धी महाविकास आघाडीचे देवदत्त निकम यांना 1 लाख 5 हजार 365 मते मिळाली आहेत. अपक्ष उमेदवार देवदत्त निकम यांनी 2985 मते घेतली. मनसेचे उमेदवार सुनील इंदोरे यांना केवळ 1483 मते मिळाली आहेत. नोटाला 1157 मते मिळाली आहेत. मतमोजणी केंद्रामध्ये हाय व्होल्टेज ड्रामा पाहायला मिळाला. पोस्टल मतदानामध्ये व पहिल्या फेरीत निकम यांना आघाडी मिळाली होती. त्यानंतर दुसऱ्या व तिसऱ्या फेरीत वळसे पाटील पुढे गेल्यानंतर चौथ्या फेरीत निकम यांना आघाडी मिळाली. पाचवी व सहावी फेरी वळसे पाटील यांच्या बाजूने गेल्यानंतर सातव्या फेरीत निकम यांनी पुन्हा आघाडी घेतली. त्यानंतर मात्र आठव्या, नवव्या, दहाव्या व अकराव्या फेरीत लगातार वळसे पाटील यांना आघाडी मिळवली.
दहाव्या फेरीत त्यांचे मताधिक्य 3 हजार 700 होते.अकराव्या फेरीत ते 5 हजार 247 झाले. बाराव्या फेरीनंतर निकम यांनी वळसे पाटील यांची आघाडी कमी करण्यास सुरुवात केली. सातव्या फेरीत पाचशेच्या आत आघाडी आली. शेवटच्या 19 आणि 20 व्या फेरीत हे अंतर खूपच कमी झाले होते. मात्र बाभूळसर गावांमध्ये वळसे पाटील यांना निर्णायक मताधिक्य मिळाले व त्यांचा विजय साकार झाला. मतमोजणी केंद्रात राष्ट्रवादी काँग्रेसचे कार्यकर्ते तसेच भीमाशंकर कारखान्याचे अध्यक्ष बाळासाहेब बेंडे हे एकत्र बसून मतांची बेरीज करत होते. तर दुसऱ्या बाजूला उमेदवार देवदत्त निकम हे सुद्धा कार्यकर्त्यांना सोबत घेऊन मतदान किती झाले याची माहिती घेत होते. शेजारी शेजारी बसलेल्या या दोन्ही पक्षांच्या कार्यकर्त्यांच्या चेहऱ्यावर तणाव स्पष्ट दिसत होता. मताधिक्य कमी अधिक होत असल्याने सर्वजण चिंतेत होते. 20 वी फेरी जेव्हा मोजून झाली तेव्हा राष्ट्रवादी काँग्रेसच्या कार्यकर्त्यांनी जल्लोष केला. तर निकम यांनी निवडणूक निर्णय अधिकारी गोविंद शिंदे यांची भेट घेऊन फेरमतमोजणीची मागणी केली.