पुणे: माजी आयपीएस अधिकारी मीरा बोरवणकर लिखित ‘मॅडम कमिशनर’ हे पुस्तक रविवारी बाजारात उपलब्ध झाले. या पुस्तकामध्ये त्यांनी तत्कालीन आणि विद्यमान पालकमंत्री अजित पवार यांचे नाव न घेता फक्त मंत्री ‘दादा’ असा उल्लेख करत गंभीर आरोप केले आहेत. २०१० साली ज्यावेळी मीरा बोरवणकर यांनी पदभार स्वीकारला, त्यावेळी अजित पवार पुण्याचे पालकमंत्री होते.
येरवड्यातील पोलिस ठाण्याच्या जमिनीचा लिलाव करण्याचा निर्णय तत्कालीन मंत्री दादा यांनी घेतला होता, असा गंभीर आरोप मॅडम कमिशनर या पुस्तकाच्या द मिनिस्टर या प्रकरणामध्ये करण्यात आला आहे.
‘द मिनिस्टर’ प्रकरणात नेमकं म्हटलंय काय?
मीरा बोरवणकर यांनी द मिनिस्टर या प्रकरणामध्ये म्हटले आहे की, पुण्याच्या पोलिस आयुक्तपदाचा कार्यभार स्वीकारल्यानंतर मी वेगवेगळ्या अधिकाऱ्यांना भेटले. तसेच आसपासच्या पोलिस ठाण्यांतील गुन्ह्यांचा आढावा घेतला. एक दिवस विभागीय आयुक्तांचा फोन आला. त्यांनी म्हटलं की, पुण्याचे पालकमंत्री तुमच्याबद्दल विचारत आहेत. त्यांना तुम्ही एकदा भेटा. येरवडा पोलिस ठाण्याच्या जमिनीसंबंधित विषय असल्याचे त्यांनी मला सांगितलं. त्यानुसार विभागीय कार्यालयात मी पालकमंत्र्यांची भेट घेतली. पालकमंत्र्यांकडे येरवडा पोलिस ठाणे परिसराचा नकाशा होता. त्यांनी सांगितले की, या जमिनीला लिलाव झाला आहे. जो जास्त बोली लावेल, त्याच्यासोबत जमीन हस्तांतरणाची प्रक्रिया पार पाडावी. पुढे या पुस्तकात, मी (मीरा बोरवणकर) पालकमंत्र्यांना सांगितले की, येरवडा पुण्यातील मध्यवर्ती ठिकाणी आहे. भविष्यात मोक्याच्या ठिकाणी जागा मिळणार नाही, असाही उल्लेख पुस्तकात करण्यात आला आहे.
‘दादां’नी केलं आरोपांचं खंडन
पुण्याचे पालकमंत्री आणि उपमुख्यमंत्री अजित पवार यांनी बोरवणकर यांनी केलेल्या या आरोपांचं खंडन केलं आहे. अशा प्रकारच्या जमिनींचा लिलाव करण्याचे अधिकार पालकमंत्र्यांना नाहीत. अशी प्रकरणे महसूल विभागाकडे जातात आणि नंतर मंत्रिमंडळ अंतिम निर्णय घेते. रेडिरेकनरनुसार मंत्रिमंडळ जमिनीची किंमत ठरवते. त्यामुळे या प्रकरणाशी आपला कसलाही संबंध नाही, असं अजित पवार यांनी स्पष्ट केले आहे.