पुणे: सोसायटीत शिरलेल्या भटक्या कुत्र्यांना हकलल्याने वाद होऊन त्यात तरुणाने एकाच्या अंगावर आपला पाळीव कुत्रा सोडला. त्यात कुत्रा चावल्यावर त्या व्यक्तीने हडपसर पोलिसात तक्रार दिली होती. पोलिसांनी पाच जणांवर गुन्हा दाखल केला आहे.
तपण संजय मेहता (वय २७, रा. हडपसर) याला हडपसर पोलिसांनी अटक केली आहे. संजय रमण मेहता व इतर तिघांवर गुन्हा दाखल करण्यात आला आहे़. याप्रकरणी सुनिल महादवे नाईक (वय ५३, रा़ हडपसर) यांनी फिर्याद दिली आहे. यातील फिर्यादी व आरोपी हे दोन्ही बिनावत टाऊनशिपमध्ये रहातात.
१५ मे रोजी रात्री साडेआठ वाजण्याच्या सुमारास नाईक हे सोसायटीमध्ये येणार्या भटक्या कुत्र्यांना बाहेर हकलत होते. त्याचा संजय मेहता यांना राग आला. त्यांनी नाईक यांना शिवीगाळ करुन आपला मुलगा तपण याला बाहेरुन मुले आणण्यास सांगितले. त्याठिकाणी बेकायदेशीर जमाव जमवला. दोघांनी मिळून नाईक व त्यांच्या पत्नीस दगडाने मारहाण करुन जखमी केले. तसेच त्यांच्याकडील पाळीव कुत्र्या चावण्यासाठी नाईक यांच्या अंगावर सोडला. पाळीव कुत्रा चावल्याने नाईक हे जखमी झाले. उपचार घेतल्यानंतर नाईक यांनी हडपसर पोलिसांकडे फिर्याद दिली असून पोलीस उपनिरीक्षक शेळके अधिक तपास करत आहेत.