थेऊर: तिरुपती बालाजी येथे देवदर्शनाला निघालेल्या थेऊर फाटा येथील १९ वर्षीय तरुणाचा अपघातातमृत्यू झाला आहे. तर आणखी तिघेजण किरकोळ जखमी झाल्याची घटना नुकतीच घडली आहे. अथर्व सचिन धुमाळ (वय १९, रा. थेऊर फाटा, कुंजीरवाडी, ता. हवेली) असे अपघातातमृत्यू झालेल्या तरुणाचे नाव आहे. हा अपघात शनिवारी २५ फेब्रुवारीला झाला होता. अथर्व याच्यावर उपचार सुरू असताना शनिवारी (ता. ४) त्याचा उपचारादरम्यान मृत्यू झाला आहे.
मिळालेल्या माहितीनुसार, अथर्व व त्याचे मित्र हे चारचाकी गाडीतून आंध्र प्रदेशातील चित्तूर जिल्ह्यात असलेले तिरुमाला तिरुपती बालाजी येथे देवदर्शनाला चारचाकी गाडीतून निघाले होते. कर्नाटक राज्यातील बेंगलोरच्या जवळ असलेल्या चित्रदुर्ग जवळील हिरीवूर या गावाजवळ गेले असता त्यांच्या चारचाकी गाडीने रस्त्यावर उभ्या असलेल्या एका कंटेनरला जोरदार धडक दिली.
या अपघातात अथर्व याच्या डोक्याला मोठ्या प्रमाणात मार लागला होता. त्याला तेथीलच एका खासगी रुग्णालयात दाखल केले होते. उपचार सुरू असताना शनिवारी त्याची प्राणज्योत मालवली. या अपघातातील तिघेजण किरकोळ जखमी झाले आहेत. दरम्यान, अथर्व याच्या जाण्याने कुंजीरवाडी परिसरावर शोककळा पसरली होती. येथील श्रीनाथ पतसंस्थेचे अध्यक्ष संदीप धुमाळ यांचा तो पुतण्या होत.