पुणे : जनता वसाहतीतील कॅनॉलवरील रोडवर रिक्षा वळवत असताना नियंत्रण सुटल्याने एक रिक्षा थेट कॅनॉलमध्ये पडली. अग्निशामक दलाच्या जवानांना एक तासाच्या प्रयत्नानंतर कॅनॉलमधून रिक्षा बाहेर काढण्यात यश मिळाले. परंतु, रिक्षाचालकाचा शोध लागू शकला नाही. कॅनॉलमधील पाण्याला वेग असल्याने तो वाहून गेल्याची भीती व्यक्त करण्यात येत आहे.
याबाबत अग्निशामक दलाकडून मिळालेल्या माहितीनुसार, रविवारी रात्री पावणेआठ वाजण्याच्या सुमारास जनता वसाहत येथील कॅनॉलवरील रोडवर एक रिक्षाचालक रिक्षा वळवत होता. मात्र, त्याचा अंदाज चुकल्याने रिक्षा कॅनॉलमध्ये पडली. जवळच अग्निशमन केंद्र असल्याने बंब व रेक्यू व्हॅन तातडीने तेथे पोहोचले. मात्र, अंधारामुळे रिक्षाचा शोध घेण्यास उशीर लागला. एक तासाच्या प्रयत्नांनंतर रात्री ९ वाजता रिक्षा बाहेर काढण्यास अग्निशामक दलाला यश आले. मात्र, रिक्षामध्ये चालक नव्हता. त्याचा शोध लागू शकला नाही. पाण्याच्या प्रवाहाबरोबर तो वाहून गेल्याची शक्यता व्यक्त करण्यात आली आहे. रात्री उशिरापर्यंत शोधकार्य सुरू होते.