पुणे : फ्लॅट नावावर करून देतो, असे सांगून महिलेला फ्लॅटवर घेऊन जाऊन तिच्यावर बलात्कार करणाऱ्या एका ज्येष्ठ वकिलावर पोलिसांनी गुन्हा दाखल केला आहे. वसंत धडकू पाटील (वय ७५, रा. गोदरेज रोझवूड सोसायटी, शिवाजीनगर) असे गुन्हा दाखल झालेल्या वकिलाचे नाव आहे.
याप्रकरणी कोंढव्यात राहणाऱ्या एका ३६ वर्षांच्या महिलेने कोंढवा पोलीस ठाण्यात फिर्याद दिली आहे. हा प्रकार शनिवार पेठेतील मंत्री हाऊसमध्ये मार्च २०१९ ते १८ मे २०२२ दरम्यान घडला.
याबाबत पोलिसांनी दिलेल्या माहितीनुसार, आरोपी हा व्यवसायाने वकील असून, फिर्यादी यांना बदनामी करण्याची धमकी देऊन त्यांच्याविषयी पतीला उलटसुलट सांगण्याची भीती दाखविली. फिर्यादीच्या लहान मुलाचे बरेवाईट करण्याची भीती दाखविली.
फिर्यादीने त्याच्याकडून हेवी डिपॉझिटवर घेतलेला फ्लॅट फिर्यादीच्या नावावर करून देण्याचे आमिष दाखविले. त्यांना शनिवार पेठेतील फ्लॅटवर घेऊन जाऊन त्यांच्या इच्छेविरुद्ध त्यांच्याशी जबरदस्तीने शारीरिक संबंध ठेवले. त्यांच्या या त्रासाला कंटाळून शेवटी फिर्यादीने पोलिसांकडे धाव घेऊन तक्रार दिली असून, सहायक पोलीस निरीक्षक शिळमकर तपास करीत आहेत.