पिंपरी : पिंपरी-चिंचवड महापालिकेचे महापौरपद खुले (सर्वसाधारण गट) झाल्याने राजकीय वातावरण तापले आहे. महापालिकेतील सत्ताधारी भाजपच्या ८५ नगरसेवकांपैकी कोणाच्या गळ्यात महापौरपदाची माळ पडणार, याबाबत उत्सुकता शिगेला पोहोचली आहे. दिग्गजांनी वरिष्ठ नेत्यांकडे मोर्चेबांधणी सुरू केली आहे. पक्षांतर्गत बैठकांना वेग आला असून, नावांची जोरदार चर्चा सुरू झाली आहे.
महापालिकेच्या स्थापनेपासून १९८२ पासून आतापर्यंत सात महिलांनी तर १९ पुरुषांनी महापौरपद भूषविले आहे. यंदा २७व्या वेळी महापौरपद खुल्या गटासाठी जाहीर झाले आहे. निवडणुकीत भाजपच्या चिन्हावर ८४ तर एका पुरस्कृतासह एकूण ८५ नगरसेवक निवडून आले आहेत. २०१७ मध्ये भाजपची सत्ता आल्यानंतर २०२२पर्यंत आतापर्यंत दोन पुरुष आणि एका महिला नगरसेविकेला महापौरपदाची संधी मिळाली होती.
-------
अनुभवी की नवखा? भाजपकडून कोणाचे नाव?
१) महापालिकेतील ८५ नगरसेवकांपैकी ४२ पुरुष तर पुरस्कृतासह ४३ महिला सदस्या आहेत. भाजपचे माजी महापौर नितीन काळजे, राहुल जाधव यांना यापूर्वी संधी मिळाली आहे. त्यामुळे यांना पुन्हा संधीची शक्यता कमी आहे. निष्ठावंतांपैकी शीतल ऊर्फ विजय शिंदे तिसऱ्यांदा निवडून आले आहेत. त्यामुळे त्यांचे नाव आघाडीवर आहे.
२) महापौरपदासाठी भाजप शहराध्यक्ष शत्रुघ्न काटे, नितीन लांडगे, सलग दोनदा बिनविरोध निवडून आलेले रवी लांडगे, उपमहापौर तुषार हिंगे, आमदार शंकर जगताप यांचे विश्वासू ज्ञानेश्वर ऊर्फ माऊली जगताप, प्रभाग क्रमांक १९ मधील निष्ठावंत मंदार देशपांडे यांच्या नावांची जोरदार चर्चा आहे. महापालिका निवडणुकीआधी भाजपमध्ये आलेले राहुल कलाटे, राजू मिसाळ, प्रशांत शितोळे यांचीही नावे चर्चेत आहेत.
----------
महिलांनाही संधी देण्याची शक्यता
महापौरपद भूषविलेल्या नगरसेवकाचा पुढील विधानसभा निवडणुकीसाठी विचार होण्याची शक्यता असते. त्यामुळे आगामी राजकीय गणित लक्षात घेता, पुरुष उमेदवारांचा पत्ता कापून महिलांना संधी दिली जाण्याची शक्यताही वर्तविली जात आहे.
-----
‘सर्वसाधारण’मध्ये सर्व प्रवर्ग खुले
महापौरपद सर्वसाधारण प्रवर्गासाठी असले, तरी सर्वसाधारण महिला, ओबीसी पुरुष-महिला, अनुसूचित जाती-जमाती या प्रवर्गातून निवडून आलेल्या नगरसेवकांनाही महापौरपदाची संधी मिळू शकते. त्यामुळे इच्छुकांची संख्या वाढली असून, अंतिम निर्णयाकडे संपूर्ण शहराचे लक्ष लागले आहे.
---
आतापर्यंतचे महापौर (कार्यकाळानुसार)
१) ज्ञानेश्वर लांडगे – १९८६-८७
२) भिकू वाघेरे – ३/८७-८७
३) नाना शितोळे – १९८७-८८
४) तात्या कदम – १९८८-८९
५) कविचंद भाट – १९८९-९०
६) सादबा काटे – १९९०-९१
७) प्रभाकर साठे – १९९१-९२
८) आझम पानसरे – १९९२-९३
९) विलास लांडे – १९९३-९४
१०) रंगनाथ फुगे – १९९४-९५
११) संजोग वाघेरे – १९९५-९६
१२) आर. एस. कुमार – १९९६-९७
१३) अनिता फरांदे – १९९७-९८
१४) हनुमंत भोसले – १९९८-९९
१५) मधुकर पवळे – १९९९-२०००
१६) लक्ष्मण जगताप – २०००-०२
१७) प्रकाश रेवाळे – २००२-०५
१८) मंगला कदम – २००५ ते २००७
१९) डॉ. वैशाली घोडेकर – २००७ ते ०८
२०) अपर्णा डोके – २००८ ते ०९
२१) योगेश बहल – २००९ ते १२
२२) मोहिनी लांडे – २०१२-१४
२३) शकुंतला धराडे – २०१४ ते १७
२४) नितीन काळजे – २०१७ - १८
२५) राहुल जाधव – २०१८-१९
२६) उषा ऊर्फ माई ढोरे – २०१९ ते २२
Web Summary : Pimpri-Chinchwad's mayoral seat is open, sparking political activity. Eighty-five corporators are vying for the position. Senior leaders are lobbying, and discussions are underway to determine the next mayor. The city awaits the final decision, with both experienced and new candidates in contention.
Web Summary : पिंपरी-चिंचवड में महापौर का पद खुला, जिससे राजनीतिक गतिविधियां तेज हो गईं। पचासी पार्षद पद के लिए प्रतिस्पर्धा कर रहे हैं। वरिष्ठ नेता पैरवी कर रहे हैं, और अगले महापौर को निर्धारित करने के लिए चर्चा चल रही है। शहर अंतिम निर्णय का इंतजार कर रहा है, अनुभवी और नए दोनों उम्मीदवार दौड़ में हैं।