पिंपरी : ऑफिसमध्ये एकट्या असलेल्या महिलेसोबत गैरवर्तन करून विनयभंग केला. तसेच महिलेचा पाठलाग केला. रिलेशन न ठेवल्यास चेहऱ्यावर ॲसिड फेकण्याची धमकीही दिली. तसेच याबाबत कोणाला सांगितले तर कंपनीमध्ये फ्राॅड केल्याची खोटी केस करून अडकवीन, अशीही धमकी दिली.
पीडित महिलेने याप्रकरणी बुधवारी (दि. १५) चिखली पोलिस ठाण्यात फिर्याद दिली. त्यानुसार संजय उत्तम राठोड (रा. चिखली, प्राधिकरण) याच्या विरोधात पोलिसांनी गुन्हा दाखल केला. पोलिसांनी दिलेल्या माहितीनुसार, फिर्यादी महिला ऑफिसमध्ये एकटीच असताना आरोपीने तिच्याशी गैरवर्तन केले. तू मला खूप आवडतेस, असे म्हणून आरोपीने फिर्यादीचा विनयभंग केला. फिर्यादी महिलेने विरोध केला. याबाबत कोणाला सांगितले तर कंपनीत फ्रॉड केल्याची खोटी केस करून अडकवीन, अशी धमकी आरोपीने दिली.
आरोपीने फिर्यादी महिलेचा पाठलाग केला. तू मला खूप आवडतेस, तू माझ्यासोबत रिलेशन ठेवले नाहीस, तर मी तुला रस्त्यामध्ये गाठून तुझ्या तोंडावर ॲसिड फेकीन, अशी धमकी दिली. त्यासोबतच वेळोवेळी फिर्यादी यांचा पाठलाग केला. हा प्रकार २८ ऑक्टोबर २०२२ रोजीच्या साधारण १० ते १२ दिवसांपूर्वी तसेच १३ फेब्रुवारी २०२३ रोजी चिखली येथे घडला, असे फिर्यादीत नमूद आहे. चिखली पोलिस तपास करीत आहेत.