पिंपरी : लेक्चरर महिलेवर एका पोलिसाने बलात्कार केल्याचा प्रकार उघडकीस आला आहे. महिला गरोदर राहिली असता तिचा गर्भपात केला. याप्रकरणी पिंपरी-चिंचवड शहर दलातील एका पोलीस कर्मचाऱ्यावर गुन्हा दाखल करण्यात आला. भोसरी, साखरेवस्ती आणि हिंजवडी फेज एक येथे ऑक्टोबर २०२० ते २ जानेवारी २०२२ या कालावधीत हा प्रकार घडला.
आकाश प्रकाश पांढरे (वय ३०, रा. रावेत), असे गुन्हा दाखल झालेल्याचे नाव आहे. याप्रकरणी पीडित २८ वर्षीय लेक्चरर महिलेने २६ फेब्रुवारी २०२२ रोजी भोसरी पोलीस ठाण्यात फिर्याद दिली.
पोलिसांनी दिलेल्या माहितीनुसार, पोलीस कर्मचारी असलेला आकाश पांढरे हा हिंजवडी पोलीस ठाण्यात नियुक्त आहे. फिर्यादी पीडित महिला ही लेक्चरर म्हणून नर्सिंगच्या विद्यार्थ्यांना शिकवते. फिर्यादी महिला तिच्या मुलीसोबत राहते. ती एकटी असल्याचा पांढरे याने गैरफायदा घेतला. आकाश पांढरे याने तो पोलीस असल्याचे पीडित महिलेला सांगितले. तू एकटी कशी राहतेस बघतो, असे म्हणून फिर्यादी महिलेला धमकी दिली. तसेच लग्नाचे आमिष दाखवून फिर्यादी महिलेसोबत वारंवार जबरदस्ती शारीरिक व अनैसर्गिक शारीरिक संबंध ठेवले. त्यापासून फिर्यादी महिला गरोदर राहिली. त्यानंतर आकाश पांढरे याने फिर्यादीला गर्भपाताच्या गोळ्या खायला लावून गर्भपात घडवून आणला, असे फिर्यादीत नमूद आहे.