पिंपरी : स्पा सेंटरच्या नावाखाली सुरू असलेल्या वेश्या व्यवसायाचा पर्दाफाश करण्यात आला. पिंपरी-चिंचवड गुन्हे शाखेच्या अनैतिक मानवी वाहतूक प्रतिबंधक कक्षाने छापा मारून कारवाई केली. यामध्ये महिलेसह दोघांना अटक केली असून तीन महिलांची वेश्या व्यवसायातून पोलिसांनी सुटका केली. पिंपळे निलख येथील जेपी फॅमिली स्पा येथे शुक्रवारी (दि. ३) रात्री पावणेनऊच्या सुमारास ही कारवाई केली.
स्पा चालक मालक जया अशोक जाधव (३३, रा. बोपोडी, पुणे), निखिल मोहन नवघन (३१, रा. लक्ष्मी नगर, थेरगाव) अशी अटक केलेल्यांची नावे आहेत. इंगवले नगर, पिंपळे निलख येथे जेपी फॅमिली स्पा येथे वेश्या व्यवसाय सुरू असल्याची माहिती पिंपरी-चिंचवड गुन्हे शाखेच्या अनैतिक मानवी वाहतूक प्रतिबंधक कक्षाला मिळाली. त्यानुसार पोलिसांनी छापा मारून कारवाई केली. त्यावेळी स्पा सेंटरमध्ये तीन महिलांना वेश्या व्यवसायासाठी प्राप्त केल्याचे निदर्शनास आले. त्या तीनही महिलांची सुटका करून स्पा सेंटर चालक मालक आणि एका साथीदाराला पोलिसांनी ताब्यात घेतले. दोघांना सांगवी पोलिसांच्या ताब्यात देण्यात आले. याप्रकरणी सांगवी पोलिस ठाण्यात गुन्ह्याची नोंद केली. सांगवी पोलीस तपास करीत आहेत.
सहायक पोलिस आयुक्त (गुन्हे) सतीश माने यांच्या मार्गदर्शनाखाली अनैतिक मानवी वाहतूक प्रतिबंधक कक्षातील पोलिस निरीक्षक देवेंद्र चव्हाण, उपनिरीक्षक प्रदीपसिंग सिसोदे, धैर्यशील सोळंके, पोलिस अंमलदार सुनील शिरसाठ, सुधा टोके, भगवंता मुठे, मारुती करचुंडे, गणेश कारोटे, वैष्णवी गावडे, संगीता जाधव, रेश्मा झावरे, सोनाली माने यांच्या पथकाने ही कामगिरी केली.