पिंपरी : व्याजाच्या पैशांसाठी मला धमक्या येत आहेत. त्यामुळे मी आत्महत्या करीत आहे. मला माफ करा... अशी पत्‍नी, मुलगा, मुलगी यांची माफी मागत एका रिक्षा चालकाने आपले जीवन संपविले. सावकारांच्‍या जाचाला कंटाळून रिक्षा चालकाने राहत्‍या घरात गळफास घेऊन आत्महत्या केली. चिंचवड स्टेशन येथील साईबाबा नगरमध्‍ये शुक्रवारी (दि. ३) दुपारी साडेबारा वाजताच्‍या सुमारास ही घटना घडली. आत्महत्येपूर्वी संबंधित रिक्षा चालकाने व्हिडिओद्वारे आपली व्‍यथा मांडली असून सावकारांनी दिलेल्‍या त्रासाबाबत सांगितले आहे.
राजू नारायण राजभर (४५, रा. साईबाबा नगर, चिंचवड स्टेशन) असे आत्महत्या केलेल्‍याचे नाव आहे. याबाबत त्‍यांचा मुलगा गणेश राजू राजभर (वय १९) यांनी शुक्रवारी (दि. ३) निगडी पोलिस ठाण्‍यात फिर्याद दिली. हनुमंता ऊर्फ अविनाश गुंडे (रा. घरकुल सोसायटी, चिखली), महादेव फुले (रा. आनंद नगर, चिंचवड स्टेशन), राजीवकुमार ऊर्फ गुड्डू भैया (रा. पिंपळे सौदागर), आणि संशयित महिलेच्या विरोधात पोलिसांनी गुन्‍हा दाखल केला.
पोलिसांनी दिलेल्‍या माहितीनुसार, फिर्यादी गणेश यांचे वडील राजू राजभर हे रिक्षा चालवितात. त्यांनी संशयितांकडून हातउसने पैसे घेतले होते. ते पैसे परत करून देखील त्याचे शिल्लक असलेल्या व्याजाची रक्कम परत न केल्याच्‍या कारणावरून संशयितानी घरात घुसून तुला मारू, तुला कापून टाकू, अशा वारंवार धमक्या दिल्या. या धमक्‍यांमुळे राजू राजभर हे सतत तणावात होते. हा तणाव असह्य झाल्‍याने तसेच संशयितांनी आत्महत्येस प्रवृत्त केल्याने राजू राजभर यांनी शुक्रवारी दुपारी साडेबारा वाजताच्‍या सुमारास राहत्‍या घरात गळफास घेऊन आत्महत्या केली.
आत्महत्येपूर्वी केला व्हिडिओ
राजू राजभर यांनी आत्महत्या करण्यापूर्वी एक व्हिडिओ तयार केला. आपण आत्महत्या का करीत आहोत, याबाबत राजू राभर यांनी व्हिडिओमधून सविस्‍तर सांगितले आहे. आत्महत्या करीत असल्‍याने आपली पत्‍नी, मुलगा व मुलीची त्यांनी व्हिडिओमधून माफीही मागितली आहे. तसेच दोन पानांची एक चिठ्‌ठीही लिहिली आहे. डोळ्यात अश्रू आणून आपली व्‍यथा मांडणाऱ्या राजू राजभर यांचा व्हिडिओ हृ्दय पिळवटून टाकणारा आहे. त्‍यांचा व्हिडिओ सोशल मीडियावर व्हायरल झाला आहे.सुसाईड नोट व्हायरल
राजू राजभर यांनी आत्महत्या करण्यापूर्वी लिहिलेली चिठ्ठी देखील सोशल मीडियावर व्हायरल झाली आहे. यात त्यांनी त्यांच्या छळाबाबत लिहिले आहे. सावकारांकडून सुरू असलेल्या त्रासामुळे आत्महत्या करत असल्याचे चिठ्ठीत नमूद आहे. या घटनेबाबत रिक्षाचालकांकडून संताप व्यक्त करण्यात येत आहे. अशा सावकारांवर कठोर कारवाई करण्याची मागणी केली जात आहे.