राष्ट्रवादीला शह

राष्ट्रवादी काँग्रेसमधून बाहेर पडल्यानंतर भाजपाच्या उमेदवारीवर चिंचवड विधानसभा मतदारसंघातून आमदारकी मिळविलेल्या आमदार लक्ष्मण जगताप यांच्यावर भाजपाने शहराध्यक्षपदाची

पिंपरी : राष्ट्रवादी काँग्रेसमधून बाहेर पडल्यानंतर भाजपाच्या उमेदवारीवर चिंचवड विधानसभा मतदारसंघातून आमदारकी मिळविलेल्या आमदार लक्ष्मण जगताप यांच्यावर भाजपाने शहराध्यक्षपदाची धुरा सोपवली आहे. भाजपाचे आमदार म्हणून सव्वा वर्षापासून काम करणाऱ्या जगताप यांचा अद्यापही राष्ट्रवादी काँग्रेसमधील काही नगरसेवकांवर प्रभाव आहे. हेच लक्षात घेऊन जगताप यांची निवड करून भाजपाने राष्ट्रवादीला शह दिला आहे.राष्ट्रवादीचे नेते अजित पवार यांनी वेळोवेळी त्यांच्या पक्षातील नगरसेवक, कार्यकर्त्यांना तंबी दिली. त्यास न जुमानता त्यांचे डझनभर नगरसेवक हे आमदार जगतापसमर्थक म्हणून वावरत आहेत. आगामी काळात भाजपाची ताकत वाढवून राष्ट्रवादीला शह देण्याच्या इराद्याने भाजपाने जगताप यांची शहराध्यक्षपदी निवड केली आहे. त्यांच्या निवडीने आगामी काळात ‘राष्ट्रवादी’ला खिंडार पडण्याची चर्चा आहे.गत लोकसभा निवडणुकीत राष्ट्रवादी काँग्रेसची उमेदवारी नाकारून लक्ष्मण जगताप यांनी शेकापच्या उमेदवारीवर निवडणूक लढवली होती. त्या वेळी राष्ट्रवादी काँग्रेसमधील काही नगरसेवकांनी जगताप यांचे उघडपणे काम केले होते. त्या निवडणुकीतील पराभव पचवून जगताप यांनी विधानसभा निवडणुकीची तयारी केली. भाजपाच्या उमेदवारीवर त्यांनी चिंचवड मतदारसंघातून यश मिळविले. जगताप यांनी शेतकरी कामगार पक्षाच्या (शेकाप) माध्यमातून निवडणूक लढवली. त्यानंतर भाजपाच्या माध्यमातून निवडणूक लढवली. थोड्या अवधीत एका पक्षातून दुसऱ्या पक्षात जाण्याचा निर्णय त्यांनी घेतला, तरी त्यांना मानणारा राष्ट्रवादी काँग्रेसमधील नगरसेवक, कार्यकर्त्यांचा गट कायम त्यांच्या पाठीशी राहिला आहे. पिंपरी-चिंचवड महापालिकेतील सत्ताधारी पक्षाचे सर्वेसर्वा आणि कारभारी माजी उपमुख्यमंत्री अजित पवार यांनी दिलेल्या कारवाईच्या धमक्यांना कोणी भीक घातली नाही. भाजपात गेल्यानंतरही राष्ट्रवादी काँग्रेस, तसेच महापालिकेत आपला प्रभाव टिकवून ठेवण्याची जगताप यांची बलशाली बाजू लक्षात घेऊन भाजपाच्या धुरंधर नेतृत्वाने त्यांची शहराध्यक्षपदावर निवड करण्याची खेळी खेळली आहे. देशात आणि राज्यात भाजपाची सत्ता आहे. पुढील वर्षात महापालिकेच्या निवडणुकीला सामोरे जायचे आहे. आमदार जगताप यांच्या ताकतीचा उपयोग करून घेण्याची हीच वेळ आहे, हे लक्षात घेऊन राष्ट्रवादी कॉँग्रेस खिळखिळी करून भाजपाची ताकत वाढवता येईल, अशी रणनीती भाजपाने यामागे अवलंबली आहे. गतवर्षी झालेल्या शिक्षण मंडळाच्या निवडणुकीत आपल्या मर्जीतील राष्ट्रवादी कार्यकर्त्यांना त्यांनी महत्त्वाच्या पदांवर संधी दिली. स्वीकृत सदस्य पदावर कार्यकर्त्यांची वर्णी लावली. भाजपात असूनही राष्ट्रवादीच्या गोटातील सूत्रे हलविण्याची किमया त्यांनी घडवून आणली. यावरून त्यांची पालिकेच्या राजकारणावरील पकड टिकून असल्याचा प्रत्यय आला. त्यांचे या शहरातील नातेगोते, तसेच जोडलेला अन्य गोतावळा यामुळे भाजपाची ताकत वाढविण्यास मदत होणार आहे. भाजपाची ताकत वाढविण्याबरोबर त्यांना नेतृत्वाचे कसब दाखवावे लागणार आहे. (प्रतिनिधी)राष्ट्रवादीचे नगरसेवक भाजपाच्या वाटेवरमहापालिकेतील सत्ताधारी राष्ट्रवादी काँग्रेसचे काही नगरसेवक भाजपाच्या वाटेवर आहेत. भाजपाचे आमदार जगताप यांचे समर्थक असलेला महापालिकेतील राष्ट्रवादी काँग्रेसचा एक गट जगताप यांच्या भाजपा शहराध्यक्ष पदाच्या निवडीने सुखावला आहे. आगामी निवडणूक डोळ्यासमोर ठेवून योग्य वेळी संधी साधून भाजपामध्ये प्रवेश करण्याची त्यांची तयारी आहे. आमदार जगताप यांच्यामुळे भाजपाच्या माध्यमातून चांगली संधी मिळेल, अशी त्यांना आशा आहे. भाजपाच्या शहराध्यक्षपदाची धूरा आमदार जगताप यांनी खांद्यावर घेतली आहे. राष्ट्रवादीत ज्याप्रमाणे स्थानिक नेत्यांच्या मर्जीने कारभार चालत होता. त्याप्रमाणे भाजपात कारभार करता येणार नाही. एखाद्याला पदावर संधी द्यायची अथवा निवडणुकीत उमेदवारी द्यायची याचा निर्णय घेताना भाजपात वेगळी प्रक्रिया आहे. भाजपाच्या प्रचलित कार्यपद्धतीत काम करणे तसेच निर्णय प्रक्रिया राबविणे आमदार जगताप यांच्यासाठी कसरतीचे ठरणार आहे.