पिंपरी : दरोडा टाकण्याच्या तयारीत असलेल्या चार जणांना पोलिसांनी अटक केली. तर, एक जण पळून जाण्यात यशस्वी झाला. ही कारवाई गुरुवारी (दि.१७) जगताप नगर, थेरगाव येथे मध्यरात्री तीनच्या सुमारास करण्यात आली. या प्रकरणी पोलिस शिपाई रमेश रामनाथ खेडकर यांनी वाकड पोलिस ठाण्यात फिर्याद दिली.
पोलिसांनी अटक केलेल्या आरोपींचे नाव शाम हरी गाडवे (वय २१, दळवीनगर, निगडी), अतिष भारत सिरसाट (वय १९, चिंचवड), नवनाथ दिगंबर साठे (वय ३५, थेरगाव), शुभम सिद्राम कांबळे (वय १९, भाटनगर, पिंपरी) अशी आहेत तर, पळून गेलेल्या आरोपीचे नाव करण उर्फे कल्ला टाक (रा.धोबीघाट, पिंपरी) असे आहे.
पोलिसांनी दिलेल्या माहितीनुसार, आरोपी थेरगावमध्ये जगताप कॉलनीमध्ये जाणाऱ्या रस्त्यावर अंधारामध्ये उभे होते. त्यांच्याकडे लोखंडी कोयते, एक मालवाहतूक टेम्पो, एक स्कुटी होती. आरोपींना पोलिस आले असल्याची चाहूल लागताच आरोपी करण टाक पळून गेला. तर, बाकींच्या आरोपींना पोलिसांनी अटक केली. दरोड्यासोबतच परिसरात येणाऱ्या नागरिकांना कोयत्याचा धाक दाखवून लुटण्याचा विचार आरोपींचा होता. पोलिसांनी आरोपींकडून तीन कोयत्यांसह पाच हजार रुपये किंमतीचा मोबाईल, ६० हजार रुपये किंमतीचा मालवाहतूक छोटा टेम्पो, एक स्कुटी सप्त केली आहे.