पिंपरी : ॲट्रॉसिटीचा गुन्हा दाखल करून जेलमध्ये टाकण्याची धमकी दिल्याप्रकरणी तिघांवर गुन्हा दाखल झाला आहे. गुन्हा दाखल झालेल्यापैकी एक राष्ट्रवादीचा माजी नगरसेवक आहे. ही घटना गुरुवारी (दि. ५) दुपारी मंडल अधिकारी कार्यालय, लांडेवाडी भोसरी येथे घडली. याप्रकरणी अधिकारी महिलेने एमआयडीसी भोसरी पोलीस ठाण्यात फिर्याद दिली आहे. त्यानुसार माजी नगरसेवक काळूराम मारुती पवार, अशोक किसन बहिरवाडे (रा. गवळीवाडा, चिंचवड स्टेशन), सागर बहिरवाडे (रा. गवळीवाडा, चिंचवड स्टेशन) यांच्याविरोधात गुन्हा दाखल झाला आहे.
पोलिसांनी दिलेल्या माहितीनुसार, आरोपींनी आपसात संगनमत करून ‘तू आमच्या विरोधात निकाल का दिला. तू इथे नोकरी कशी करते तेच मी बघतो,’ अशी धमकी देत फिर्यादीकडील कागदपत्रे हिसकावण्याचा प्रयत्न केला. तसेच चिखली येथे बैलगाडा शर्यती असल्याने बैलगाडा शर्यतीच्या घाटाचा पंचनामा करण्यासाठी फिर्यादी जात असताना आरोपींनी त्यांच्या गाडीची चावी हिसकावून घेतली आणि रस्ता अडवून शासकीय कामात अडथळा आणला.
आरोपी काळूराम पवार याने फिर्यादी यांना ‘तुझ्यावर ॲट्रॉसिटीची केस करून तुला जेलमध्ये टाकतो,’ अशी धमकी दिली असल्याचे फिर्यादीत म्हटले आहे.