पिंपरी : देहूरोड येथे थॉमस कॉलनी जंगल परिसरालगत १६ वर्षीय युवकाचा खून झाल्याची घटना गुरुवारी (दि. १२) पहाटे उघडकीस आली. हा खून प्रेमाच्या त्रिकोणातून झाला. खून झालेल्या युवकाचा चुलत भाऊ संशयिताने केलेल्याच्या हल्ल्यात जखमी झाला. संशयित पसार झाला असून त्याच्या शोधासाठी दोन पथके रवाना करण्यात आली आहेत.
दिलीप मौर्या (१६, रा. थॉमस कॉलनी, देहूरोड) असे खून झालेल्याचे नावे आहे. अरुण सुखराम मौर्या (वय १४) हा जखमी झाला आहे. सनी सिंग (रा. शिवान, बिहार) असे संशयिताचे नाव आहे. सोमटणे फाटा येथील एका युवतीसोबत संशयित सनी आणि दिलीप माैर्या या दोघांचेही प्रेम प्रकरण सुरू होते. या प्रेम प्रकरणातून तीन महिन्यांपूर्वी त्या दोघांचे भांडण झाले होते. बुधवारी रात्री दिलीप याने अरुण याला फोन करून थॉमस कॉलनीजवळ जंगल परिसरात बोलावून घेतले. तिथे सनी सिंग आणि दिलीप यांचे भांडण झाले. सनीने दिलीप यांच्या गळ्यावर चाकूने वार केले. भांडण सोडविण्यासाठी अरुण मध्ये पडला असता सनी याने अरुणच्या छातीवर चाकूने हल्ला केला. त्यानंतर तो पळून गेला. अरुण जखमी अवस्थेत थॉमस कॉलनीत आला. त्याने मित्रांना घडलेल्या घटनेबाबत माहिती दिली. अरुण याला देहूरोड कॅन्टोन्मेंट बोर्ड रुग्णालयात दाखल करण्यात आले. घटनेची माहिती मिळताच देहूरोड पोलिसांनी घटनास्थळी धाव घेतली असता दिलीप याचा मृतदेह आढळून आला. संशयिताच्या शोधासाठी दोन पथके रवाना करण्यात आली आहेत. वरिष्ठ पोलिस निरीक्षक विक्रम बनसोडे तपास करीत आहेत.