डीडीसाठी बँकांकडून टोलवाटोलवी

स्टेट बँक ऑफ हैदराबादचे विलीनीकरण भारतीय स्टेट बँकेत केल्याने राष्ट्रीयकृत बँकेच्या शाखांची संख्या तीनवरून दोनवर आली. त्याप्रमाणे कर्मचाऱ्यांची संख्यादेखील स्टेट बँकेत घटली. त्याचा फटका आता ग्राहकांना सोसावा लागतोय. सध्या भारतीय स्टेट बँकेच्या शाखेकडून डीडी काढला जात नाही. अत्यावश्यक कामही असले तरीही स्टेट बँकेकडून नकार दिला जातो. त्याचे कारण विचारल्यास खोटे बोलून ग्राहकांची शुद्ध फसवणूक केली जाते. सर्वाधिक खातेदार असलेल्या या बँकेची कृती अशोभनीय आहे. त्याची प्रचिती एस.आर. बने यांना दुसऱ्यांदा आली. त्यांनी ६ सप्टेंबरला स्टेट बँकेत डीडी काढला होता. तो वेळेत पोहोचेल, हा विश्वास फोल ठरला. परंतु १५ सप्टेंबरपर्यंत डीडी जमा झाला नाही. त्याची विचारणा केल्यास उडवाउडवीची उत्तरे बँकेकडून मिळाली. शासकीय नोकरीचा अर्ज भरण्यासाठी गेलेल्या अर्जदाराचे नातेवाईक सुधाकर हनवते यांनाही टोलवाटोलवी करण्यात आली. कर्मचाऱ्यांकडून-शाखाधिकाऱ्यांकडे आणि शाखाधिकाऱ्यांकडून-कर्मचाऱ्यांकडे त्यांना पाठविण्यात आले तरीही डीडी न देण्याचे कारण विचारल्यानंतर खुद्द शाखाधिकारी विजयकुमार वर्मा यांनी याबाबत कर्मचाऱ्यांना विचारा, तेच सांगतील, असे म्हणून जबाबदारी झटकली. तत्पूर्वी केबिनचा दरवाजा बंद करून ते काम करत होते. ते खातेदारांना उत्तर देण्याचे दायित्व समजत नाहीत. हा प्रकार मागील काही दिवसांपासून सुरू असल्याचे ग्राहकांकडून ऐकण्यास मिळाले. दुसरीकडे महाराष्ट्र ग्रामीण बँकेतही डीडी दिला जात नाही. त्याचे कारण प्रिंटर नसल्याचे सांगण्यात आले. प्रिंटरअभावी काढलेल्या डीडीची प्रिंट देता येत नाही म्हणून ग्रामीण बँकही डीडी टाळत आहेत. जर तालुक्यातील दोन्हीही ठिकाणी डीडी दिला जात नसल्याचे ग्राहकांवर राष्ट्रीयीकृत बँकांच्या शाखेवर पश्चाताप करण्याशिवाय पर्याय नाही. अनेक तक्रारी, विनंत्या, इशारे दिल्यानंतरही स्टेट बँकेच्या वर्तवणुकीत जराही फरक पडला नाही, हे विशेष.

आठ दिवसांनंतरही डिडी पोहचला नाही. त्याची विचारणा करण्यासाठी कर्मचाऱ्यांपर्यंत गर्दीमुळे जाता येत नाही. शाखाधिकारी तर दरवाजा बंद करून बसलेत. जेव्हापासून मागील शाखाधिकाऱ्यांची बदली झाली. तेव्हापासून भारतीय स्टेट बँकेत गोंधळ सुरू झाला आहे.

-एस. आर. बने, शिक्षक, पालम.

प्रिंटरअभावी डीडी काढणे बंद आहे. प्रिंटरची मागणी करण्यात आली आहे. तरीही अत्यावश्यकवेळी हस्तलिखीत डीडी देण्याचे नियोजन करण्यात आले आहे.

-एस. एस. स्वामी, शाखाधिकारी, महाराष्ट्र ग्रामीण बँक, पालम.

डीडीबद्दल माझ्याऐवजी कर्मचाऱ्यांनाच विचारा ते सांगतील. डीडी काम तेच करतात.

- विजयकुमार वर्मा, शाखाधिकारी, भारतीय स्टेट बँक, पालम.