पाथरी येथे घरात घुसून मारहाण

पाथरी : शहरातील जैतापूर मोहल्ला येथील शेख मुसीरोद्दीन शेख शमशोद्दीन यांच्या घरात घुसून शिवीगाळ करून मारहाण केली़ तसेच जादूटोणा केल्याप्रकरणी न्यायालयाच्या आदेशावरून परभणी येथील तीन आरोपींच्या विरोधात पाथरी पोलिस ठाण्यामध्ये गुन्हा दाखल करण्यात आला़ शहरातील जैतापूर मोहल्ला येथील शेख मुसीरोद्दीन हे ३० मे रोजी सकाळी ११ वाजण्याच्या सुमारास आपल्या घरी कुटुंबासोबत बसले होते़ याचवेळी त्यांच्या भावाचे मेहुणे अब्दुल साबेर अब्दुल ताहेर, अब्दुल जाकेर अब्दुल ताहेर आणि अब्दुल नाजेर अब्दुल ताहेर (रा़ सागरनगर, परभणी) हे अचानक घरात घुसले शेख मुसीरोद्दीन यांना शिवीगाळ करून मारहाण करू लागले़ यातील आरोपींनी शेख मुसीरोद्दीन खाली पाडून त्यांच्यावर बंगाली बाबापासून बनविलेले मंत्र व जादू केलेल्या काळ्या कापड्याचा पुतळा, सुया टोचलेले लिंबू आणि काळे धागे फेकून जबरदस्तीने त्याच्या डोक्यावर लाल व पिवळ्या रंगाचे पावडर लावून मारहाण केली आणि याप्रकरणी पोलिसांत तक्रार दिली तर पुन्हा मारहाण करू अशी धमकी दिली़ सदरील घटनेप्रकरणी शेख मुसीरोद्दीन यांनी पाथरी पोलिस ठाण्यामध्ये लेखी तक्रार दिली होती़ परंतु, पोलिसांनी याप्रकरणी गुन्हा दाखल न केल्याने शेख मुसीरोद्दीन यांनी अ‍ॅड़ मुजाहेद ताहेर अन्सारी यांच्यामार्फत ३१ मे रोजी पाथरी येथील फौजदारी न्यायालयात फिर्याद दाखल केली़ या फिर्यादीची दखल घेत न्यायाधीश हाश्मी यांनी अ‍ॅड़ मुजाहेद ताहेर अन्सारी यांचा युक्तिवाद ग्राह्य धरून सदर घटनेतील तिन्ही आरोपीविरूद्ध पाथरी पोलिसांना गुन्हा दाखल करण्याचे आदेश दिले़ न्यायालयाच्या आदेशावरून पाथरी पोलिस ठाण्यामध्ये सय्यद साबेर, अब्दुल जाकेर, अब्दुल नाजेर या तिघांविरोधात गुन्हा दाखल करण्यात आला आहे़ प्रकरणाचा अधिक तपास पोहेकॉ कनके हे करीत आहेत़ (वार्ताहर)सदर प्रकरणी शहरातील जैतापूर मोहल्ला येथील शेख मुसीरोद्दीन यांनी अ‍ॅड़ मुजाहेद ताहेर अन्सारी यांच्या मार्फत फौजदारी न्यायालयात फिर्याद दाखल केली होती़ न्यायाधीशांनी हा युक्तिवाद ग्राह्य धरून सदरील घटनेतील तिन्ही आरोपींविरूद्ध गुन्हा दाखल करण्याचे आदेश दिले़