महसूल प्रशासनाच्या जागेवरील अतिक्रमण काढले

गंगाखेड शहरातील अहिल्याबाई होळकर चौक परिसरात असलेल्या तलाठी भवनच्या शेजारील सर्व्हे नंबर २४८ मधील महसूल प्रशासनाच्या मोकळ्या जागेवर हॉटेल, पानटपरी, चप्पल, बूट, जनरल स्टोअर्स, फोटो स्टुडिओ आदी दुकान चालकांनी अतिक्रमण केले होते. महसूल प्रशासनाच्या जागेवर झालेले अतिक्रमण २४ तासांच्या आत स्वतःहून काढून घ्यावे, अशा सूचना २९ जानेवारी रोजी अतिक्रमण धारकांना देण्यात आल्या होत्या. यातील बहुतांश दुकानदारांनी ३० जानेवारी रोजीच्या रात्री अतिक्रमण काढून घेतले. नगरपालिका, तहसील व पोलीस प्रशासनाच्यावतीने ३१ जानेवारी रोजी केलेल्या संयुक्त कार्यवाहीत सकाळी ७ ते १० च्या सुमारास उपविभागीय अधिकारी सुधीर पाटील, उपविभागीय पोलीस अधिकारी गोविंद खोडवे, तहसीलदार तथा प्रभारी मुख्याधिकारी स्वरूप कंकाळ, पोलीस निरीक्षक वसुंधरा बोरगावकर, नायब तहसीलदार गणेश चव्हाण, उपमुख्याधिकारी स्वाती वाकडे, वसंत वाडकर, मंडळ अधिकारी शंकरराव राठोड, तलाठी चंद्रकांत साळवे, दत्तराव बिलापट्टे आदींच्या उपस्थितीत उर्वरित दुकानदारांचे अतिक्रमण काढण्यात आले. यावेळी पोलीस अधिकारी व कर्मचाऱ्यांचा प्रचंड पोलीस बंदोबस्त लावण्यात आला होता.

शहरातील मुख्य रस्तावरील अतिक्रमण काढा

महसूल प्रशासनाच्या जागेवर असलेले अतिक्रमण काढले. त्याचप्रमाणे शहरातील मुख्य रस्त्यावर ठिकठिकाणी झालेल्या पान टपरी, दुकानांसमोरील ओटे, रस्त्यावर ठेवलेल्या सामानाच्या अतिक्रमणामुळे रहदारीस अडथळे निर्माण होत असल्याने मुख्य रस्त्यावरील अतिक्रमणही काढून शहरातील रस्ते रहदारीसाठी मोकळे करावेत अशी मागणी शहरवासीयांतून केली जात आहे.