अवैध वाळू वाहतूक : दोन टिप्पर पकडले

शहरातील नवा मोंढा पोलीस ठाण्याचे कर्मचारी २५ मे रोजी गस्तीवर असताना दुपारी १ च्या सुमारास कल्याण मंडपम्‌समोरील रोडवर एमएच ०४ डीके ९५८८ क्रमांकाचा टिप्पर भरघाव वेगाने जाताना त्यांना दिसला. या वाहनाचा पाठलाग करून त्यास थांबविले असता त्यामध्ये १ ब्रास चोरटी वाळू आढळून आली. सदरील वाहन जप्त करून मोंढा पोलीस ठाण्यात आणण्यात आले. याबाबत पोलीस कर्मचारी अशोक विठ्ठलराव नागरगोजे यांनी फिर्याद दिली. त्यावरून टिप्पर चालक शेख जुबरे चाँद व त्याच्या सोबतची व्यक्ती सय्यद युसुफ सय्यद इनायत अली या दोघांविरुद्ध गुन्हा दाखल करण्यात आला आहे. दुसऱ्या घटनेत पोलिसांनी २६ मे रोजी वसमत रोड भागात कन्हय्या हॉटेलसमोर अवैध वाळू घेऊन जाणारा एमएच ०४ सीयू ६५२० क्रमांकाचा टिप्पर पकडले. त्यात दोन ब्रास अवैध वाळू आढळून आली. याबाबत पोलिसांनी वाहनचालकाकडे पावतीची विचारणा केली असता त्याने चुकीची पावती दिल्याचे निदर्शनास आले. याबाबत पोलीस कर्मचारी विलास आनंदराव बळवंते यांनी बुधवारी फिर्याद दिली. त्यावरून टिप्पर चालक बळीराम माणिक पुरी (दुसलगाव ता. गंगाखेड) याच्याविरुद्ध नवा मोंढा पोलीस ठाण्यात गुन्हा दाखल करण्यात आला आहे.