‘४००० रुपये दर द्या’; पाथरीत ऊस उत्पादक शेतकऱ्यांचा एल्गार, रास्तारोकोमुळे वाहतूक ठप्प

स्वाभिमानी संघटना आणि किसान सभेच्या वतीने रास्ता रोको, २ तास वाहतूक ठप्प

पाथरी (परभणी):परभणी जिल्ह्यात ऊस गाळप हंगाम सुरू झाला असला तरी, ऊस उत्पादक शेतकऱ्यांमध्ये दरावरून असलेला प्रचंड असंतोष आज चव्हाट्यावर आला. ऊसाला प्रतिटन ४००० रुपये अंतिम दर देण्याच्या मागणीसाठी स्वाभिमानी शेतकरी संघटना आणि किसान सभेच्या वतीने पाथरी परभणी रस्त्यावर पोखरनी फाट्यावर मोठे रास्ता रोको आंदोलन करण्यात आले. दुपारी १२ वाजल्यापासून सुरू झालेल्या या आंदोलनामुळे पाथरी-परभणी रस्त्यावरील वाहतूक जवळपास दोन तास खोळंबली होती.

‘उत्पादनात नफा मिळवा, मग शेतकऱ्याला न्याय द्या!’अखिल भारतीय ऊस उत्पादक शेतकरी समितीच्या वतीने हे आंदोलन पुकारण्यात आले असून, शेतकऱ्यांनी आपल्या मागण्यांची एक लांब यादी प्रशासनासमोर ठेवली आहे. शेतकरी वर्ष २०२५–२६ साठी उसाला पहिली उचल प्रतिटन ₹३००० आणि अंतिम दर ₹४००० जाहीर करण्याची मुख्य मागणी करत आहेत.

इतर मागण्या:- साखर, इथेनॉल आणि उपपदार्थातून मिळणाऱ्या नफ्याच्या प्रमाणात शेतकऱ्यांना न्याय मिळाला पाहिजे.- २०२४–२५ मधील साखर कारखान्यांच्या प्रलंबित बिलांची तात्काळ पूर्तता व्हावी.- तोडणी व वाहतूक दर प्रतिटन ₹२०० पेक्षा जास्त वाढवू नये.- वीज, खत, औषधे यांच्या महागाईचा विचार करून अतिरिक्त प्रोत्साहन रक्कम जाहीर करावी.- PFMS द्वारे शेतकऱ्यांच्या खात्यात थेट रक्कम जमा करण्याची सक्ती करावी.

मागण्या पूर्ण झाल्याशिवाय माघार नाहीशेतकऱ्यांनी रस्त्यावर ठिय्या मांडल्यामुळे पाथरी-परभणी मार्गावर वाहनांच्या लांबच लांब रांगा लागल्या होत्या. आंदोलक शेतकरी आपल्या भूमिकेवर ठाम आहेत. लेखी हमी दिल्याशिवाय आंदोलन मागे घेतले जाणार नाही, असा इशारा आंदोलकांनी दिला आहे. जीवनावश्यक गरजा आणि महागाईचा विचार करून सरकारने न्याय्य मागण्यांकडे तात्काळ लक्ष द्यावे, अशी तीव्र मागणी शेतकऱ्यांनी केली आहे.