जिल्हाधिकाऱ्यांनी घेतली कोरोनाची दुसरी लस

जिल्ह्यात १६ जानेवारीपासून कोरोना लसीकरणाला सुरुवात झाली असून, ज्येष्ठ नागरिकांना सुद्धा या लसीचा पहिला डोस दिला जात आहे. जिल्हाधिकारी दीपक मुगळीकर यांनी ६ फेब्रुवारी रोजी कोरोना लसीचा पहिला डोस घेतला होता. एक महिना उलटल्यानंतर आज ६ मार्च रोजी लसीकरणातील दुसरा डोस घेऊन त्यांनी लसीकरणाचे दोन टप्पे यशस्वीपणे पूर्ण केले आहेत. जिल्हा शल्य चिकित्सक डॉ. बाळासाहेब नागरगोजे, निवासी वैद्यकीय अधिकारी डॉ. किशोर सुरवसे व इतर वैद्यकीय अधिकारी, परिचारिका यांच्या उपस्थितीत त्यांनी लसीचा दुसरा डोस घेतला. कोविड-१९ लसीकरणासाठी शासनाने सुरक्षिततेच्या दृष्टीने योग्य खबरदारीच्या उपाययोजना घेतल्या आहेत. संपूर्ण लसीकरण मोहिमेत पावलोपावली दक्षता घेण्याचे आदेश शासनाने निर्गमित केले आहेत. त्यामुळे ही लस पूर्णत: सुरक्षित असून, प्रत्येकाने लसीकरण करु घ्यावे, असे आवाहन जिल्हाधिकारी दीपक मुगळीकर यांनी केले.