लहान मुलांची तब्येत बिघडली; ओपीडीमध्ये दुप्पट वाढ...!

परभणी : जिल्ह्यात मागच्या पंधरा दिवसांपासून डेंग्यू साथीचा फैलाव झाला असून, जिल्हा रुग्णालयात रुग्णांची संख्या दुपटीने वाढली आहे.

पावसाळा सुरू होताच साथीचे आजार वाढतात. यावर्षी डेंग्यू, चिकुनगुनिया यासारख्या साथीचा फैलाव जिल्ह्यात झाला आहे. शहरी भागासह ग्रामीण भागातही ही साथ मोठ्या प्रमाणात पसरली असून, येथील जिल्हा सामान्य रुग्णालयात ताप, खोकल्याने त्रस्त असलेले रुग्ण मोठ्या संख्येने दाखल होत आहेत. जिल्हा रुग्णालयात साधारणत: १२०० रुग्णांची ओपीडी आहे. ती आता दुप्पट झाली आहे. विशेष म्हणजे खासगी रुग्णालयांमध्येही उपचार घेणाऱ्या तापाच्या रुग्णांमध्ये मोठी वाढ झाली आहे.

५० टक्के मुलांची कोरोना चाचणी

तापाच्या आजारावर उपचार घेण्यासाठी जिल्हा रुग्णालयात दाखल झालेल्या मुलांपैकी ५० टक्के मुलांची कोरोना चाचणी करण्यात येत आहे.

संशयित वाटत असल्यास मुलांची कोरोना चाचणी करून घेतली जात असल्याचे सांगण्यात आले.

डेंग्यूच्या २७६ तपासण्या

जिल्हा हिवताप अधिकारी कार्यालयाने जुलै अखेरपर्यंत डेंग्यू संशयित रुग्णांच्या २७६ तपासण्या केल्या आहेत, तर मलेरियाच्या २३ हजार ३९२ तपासण्या करण्यात आल्या आहेत. मात्र, या सर्व तपासण्यांमध्ये एकही रुग्ण पॉझिटिव्ह आढळला नाही.

सध्या तापाची साथ मोठ्या प्रमाणात आहे. ताप नियंत्रणात आणण्यासाठी स्वच्छता महत्त्वाची आहे. मनपाने स्वच्छता मोहीम प्रभावीपणे राबवावी, तसेच नागरिकांनीही घरासमोरील नाल्या वाहत्या कराव्यात, तसेच पूर्ण अंग झाकतील असे कपडे वापरावेत. जेणे करून डास चावला तरी त्याची तीव्रता कमी होऊ शकेल. त्याचप्रमाणे पाणी उकळून प्यावे. हवेतून आणि डासांमुळे ही साथ पसरत आहे. त्यामुळे डासांची उत्पत्ती होणार नाही, यादृष्टीने प्रत्येकाने काळजी घ्यावी. मुलांना तापाची लक्षणे आढळत असल्यास डॉक्टरांच्या सल्ल्याने उपचार करावेत.

- डॉ. संदीप कार्ले

ही घ्या काळजी

घराचा परिसर स्वच्छ ठेवावा. घरासमोरील नाल्या वाहत्या कराव्यात. आठवड्यातून एक दिवस कोरडा दिवस पाळून पाण्याचे भांडे रिकामे करावेत. झोपताना मच्छरदाणीचा वापर करावा, तसेच डास निर्मूलनाचे उपाय करावेत.