सानिया मिर्झाला राजीव गांधी खेलरत्न पुरस्कार

विम्बल्डनमध्ये महिला दुहेरीचे विजेतेपद पटकावणारी टेनिसपटू सानिया मिर्झाला आता राजीव गांधी खेलरत्न पुरस्काराने सन्मानित करण्यात येणार आहे.

 ऑनलाइन लोकमत 

नवी दिल्ली, दि. ११ - विम्बल्डनमध्ये महिला दुहेरीचे विजेतेपद पटकावणारी टेनिसपटू सानिया मिर्झाला आता राजीव गांधी खेलरत्न पुरस्काराने सन्मानित करण्यात येणार आहे. पुरस्कार समितीच्या बैठकीत सानियाच्या नावावर शिक्कामोर्तब केले आहे. 

क्रीडा मंत्रालयाने २०१५ च्या राजीव गांधी खेलरत्न पुरस्कारासाठी सानिया मिर्झाच्या नावाची शिफारस केली होती. मात्र हा पुरस्कार सानियाला द्यायचा की नाही हा निर्णय निवड समिती करेल असे क्रीडा मंत्रालयाने स्पष्ट केले होते. या पार्श्वभूमीवर मंगळवारी निवड समितीच्या १२ सदस्यांची बैठक ार पडली. या बैठकीत सानिया मिर्झाच्या नावावर शिक्कामोर्तब करण्यात आले. याशिवाय अर्जून पुरस्कारांसाठीही काही खेळाडूंच्या नावावर चर्चा झाल्याचे सूत्रांनी सांगितले. 

हैदराबादच्या सानिया मिर्झासाठी यंदाचे वर्ष हे चांगले ठरले असून दुहेरी टेनिसच्या क्रमवारीत अव्वल स्थान गाठणारी ती पहिली भारतीय टेनिसपटू ठरली आहे. जुलैमध्ये सानिया व मार्टिना हिंगिस या जोडीने विम्बल्डनमध्ये महिला दुहेरीचे विजेतेपद पटकावले. याशिवाय सानियाने मिश्र दुहेरीत सुवर्ण व महिला दुहेरीत कांस्य पदक पटकावले होते. 

सानियाला ००४ मध्ये अर्जून पुरस्कार, २००६ मध्ये पद्मश्री पुरस्काराने सन्मानित करण्यात आले होते. खेलरत्न पुरस्काराने सन्मानित होणारी सानिया ही पहिली महिला टेनिसपटू ठरली आहे. टेनिसमध्ये यापूर्वी १९९६ - ९७ मध्ये लिएंडर पेसला खेलरत्न पुरस्कार देण्यात आला होता.