गंभीर - उथप्पाची दमदार फलंदाजी, केकेआरने जिंकली दिल्ली

कर्णधार गौतम गंभीर आणि रॉबीन उथप्पा या जोडीने केलेल्या दमदार फलंदाजीच्या जोरावर केकेआरने दिल्लीवर सात विकेटने विजय मिळवला

ऑनलाइन लोकमत
कोलकाता, दि. 28 - कर्णधार गौतम गंभीर आणि रॉबीन उथप्पा या जोडीने केलेल्या दमदार फलंदाजीच्या जोरावर केकेआरने दिल्लीवर सात विकेटने विजय मिळवला. दिल्लीने दिलेले 161 धावांचे आव्हान केकेआरने 22 चेंडू राखून पार केले. या विजयाचा शिल्पकार कर्णधार गौतम गंभीर ठरला. गंभीरने 52 चेंडूत नाबाद71 धावांची खेळी केली, तर रॉबीन उथप्पाने 33चेंडूत 59 धावा ठोकल्या. दोघांनी दुसऱ्या विकेटसाठी 108 धावांची भागीदारी रचली. कोलकाताने तीन षटके शिल्लक ठेवून दिल्लीचे 161 धावांचे आव्हान गाठले आणि सात विकेट्सने विजय साजरा केला.
त्यापूर्वी, संजू सॅमसन आणि श्रेअस अय्यर यांच्या फलंदाजीच्या बळावर दिल्लीने 20 षटकात सहा बाद 160 धावा केल्या. संजू सॅमसनने 38 चेंडूत तीन षटकार आणि सहा चौकाराच्चा मदतीने 60 धावा केल्या. करुण नायर आणि संजूने पहिल्या विकेट साठी 4.5 षटकात 48 धावांची सलामी दिली. करुण नायर बाद झाल्यनंतर श्रेअस अय्यरने संजू सॅमसनला सुरेख साथ देताना धावगती वाढवली. श्रेअस अय्यरने 34 चेंडूत 47 धावांची खेळी केली, या खेळीदरम्यान त्याने 1 षटकार आणि चार चौकार लगावले. पंथ, अँडरसन, मॉरीस हे आज पुन्हा एकदा अपयशी ठरले. शेवटच्या पाच षटकात दिल्लीकरांना फक्त 30 धावा करता आल्या. हाणामारीच्या षटकात दिल्लीच्या फलंदाजांनी नांगी टाकल्यामुळे दिल्लीची धावसंख्या मर्यादित राहिली. कोलकात्याकडून कुल्टर नाइलने 3 बळी मिळवले.