घरफोडीला ठरविले अदखलपात्र गुन्हा

कोपरखैरणेमध्ये अनिल मोबाइल या दुकानामध्ये ८ जूनला रात्री चोरी झाली. चोरट्यांनी दुकानाचे शटर तोडून आतमधील रोख रक्कम व २२ मोबाइल

लोकमत न्यूज नेटवर्क
नवी मुंबई : कोपरखैरणेमध्ये अनिल मोबाइल या दुकानामध्ये ८ जूनला रात्री चोरी झाली. चोरट्यांनी दुकानाचे शटर तोडून आतमधील रोख रक्कम व २२ मोबाइल चोरून नेले. दुकान मालकाने चोरट्याचे सीसीटीव्हीमधील चित्रण, नाव व पत्ता दिला आहे. पण पोलिसांनी एक महिन्यात गुन्हाही दाखल केला नाही व आरोपीस अटकही केलेली नाही.
येथील सेक्टर ७ मध्ये शांताराम दानवले यांचे अनिल टेलर्स व अनिल मोबाइल नावाने दोन छोटी दुकाने आहेत. ८ जूनला रात्री दुकान बंद करून ते घरी गेले असताना चोरट्यांनी शटर तोडून आतमधील २३ हजार रूपये रोख रक्कम व दुरूस्तीसाठी आलेले २२ मोबाइल चोरून नेले आहेत. या प्रकरणी दानवले यांनी ९ जूनला कोपरखैरणे पोलीस स्टेशनमध्ये तक्रार दिली.
पोलिसांनी घरफोडीचा गुन्हा दाखल करणे आवश्यक होते. परंतु प्रत्यक्षात अदखलपात्र गुन्ह्याची नोंद केली आहे. दुसऱ्या दिवशी दुकानातील सीसीटीव्हीमधील चित्रण तपासले असता कोपरखैरणे परिसरामध्येच राहणाऱ्या सूरज नावाच्या तरुणाने चोरी केल्याचे निदर्शनास आले. हा तरुण कोठे राहतो याचीही माहिती घेवून पोलिसांना देण्यात आली आहे.
चोरीची घटना घडून जवळपास एक महिना पूर्ण होत आला आहे. चोरी कोणी केली याची माहिती, पत्ता पोलिसांना देण्यात आला आहे. चोरट्याचे छायाचित्र कॅमेऱ्यामध्ये स्पष्ट दिसत आहे.
यानंतरही पोलिसांनी अद्याप घरफोडीचा गुन्हा दाखल केला नसल्याने आश्चर्य व्यक्त केले जात आहे. आरोपीची ओळख पटल्यानंतर तत्काळ त्याला अटक केली असती तर त्याने चोरी केलेली २३ हजार रुपयांची रोकड व दुकानामध्ये दुरुस्तीसाठी आलेले २२ मोबाइल तत्काळ हस्तगत करण्यात यश आले असते. पोलीस आरोपीला पकडण्यात का दुर्लक्ष करत आहेत याविषयी दुकानमालक शांताराम दानवले यांनी आश्चर्य व्यक्त केले आहे.