नवीन पनवेल : मित्रासोबत मोटारसायकलवरून घरी जात असताना रस्त्यावर पडल्याने जखमी झालेली शैफिता मुस्ताक खान (२३) हिचा मृत्यू झाला. ही घटना तळोजा-कल्याण मार्गावर घडली. मित्र भरधाव मोटारसायकल चालवत होता. त्यावेळी ती खाली पडली. तळोजा पोलिसांनी मित्र सुफियान सलीम कुरेशी (२८) याच्याविरोधात गुन्हा दाखल केला.
शैफिता ही कल्याण पलावा येथील मारवेला सोसायटीत आपल्या कुटुंबासह राहत होती. शैफिता ही चेंबूर येथील आयटी कंपनीत काम करत होती. शैफिता कामावर गेली होती. त्यानंतर रात्री ९ च्या सुमारास शैफिताने आपल्या आईला फोन करून कामावरून घरी येण्यास तिला उशीर होणार असल्याचे सांगितले होते. त्यानंतर रात्री १०.३० वाजण्याच्या सुमारास शैफिता आपला मित्र सुफियान सलीम कुरेशी (२८) याच्यासोबत दुचाकीवरून घरी परतत होती.
भरधाव वेगाने जाणाऱ्या दुचाकीवरुन तळोजा एमआयडीसीतील नावडे फाटा महानगर गॅस पंपाजवळ तिचा तोल गेल्याने ती खाली पडली. गंभीर जखमी झाल्याने तिला कामोठे येथील एमजीएम रुग्णालयात दाखल केले. मात्र तेथील डॉक्टरांनी तिला मृत घोषित केले.