लोकमत न्यूज नेटवर्क, नवी मुंबई: NMMT च्या घणसोली येथील आगारातआग लागल्याची घटना बुधवारी सकाळी घडली. त्यामध्ये चार बस पूर्णपणे जळून खाक झाल्या आहेत. इतर तीन ते चार बसचे नुकसान झाले आहे. इलेक्ट्रिक बसमुळे ही दुर्घटना घडली आहे.
घणसोली आगारात एनएमएमटीच्या वापरात नसलेल्या सुमारे ५० बस उभ्या केल्या आहेत. त्याच ठिकाणी इलेक्ट्रिक बसदेखील उभी करण्यात आली होती. सध्या एनएमएमटीच्या ताफ्यात असलेल्या इलेक्ट्रिक बस बंद पडण्याचे प्रकार सतत घडत आहेत. या इलेक्ट्रिक बसच्या बॅटरींमध्ये बिघाड होत असल्याचे समजते. अशातच घणसोली आगारात दुरुस्तीसाठी आलेल्या इलेक्ट्रिक बसला बुधवारी सकाळी ७ च्या सुमारास आग लागली.
काही वेळातच पूर्ण बसने पेट घेतल्याने बाजूलाच असलेल्या तीन डिझेल बस जळाल्या. यामुळे मोठ्या प्रमाणात धुराचे लोट निघाले होते. आगीची माहिती मिळताच कोपरखैरणे व ऐरोली अग्निशमन दलाने तेथे धाव घेतली. त्यांनी वेळीच आगीवर नियंत्रण मिळविल्याने ५० बस वाचल्या.
‘पत्रकारांना आत सोडू नका’
आगारात लागलेल्या आगीची माहिती कळताच पत्रकार, छायचित्रकारांनी त्याठिकाणी धाव घेतली. मात्र कोणत्याही पत्रकाराला आत सोडायचे नाही, असे अधिकाऱ्यांचे आदेश असल्याचे सुरक्षा रक्षकांनी सांगत माध्यमांना आत प्रवेश नाकारला. त्यावरून डेपोत नेमके काय गौडबंगाल चालले आहे का? असा प्रश्न निर्माण झाला आहे.
प्रशासन म्हणते, म्हणून आग गतीने पसरली
डेपोत आग लागलेल्या बसची नियमित दुरुस्ती करण्याची व सुट्या भागांसह जबाबदारी मूळ उत्पादक व पुरवठादार मे एम. एच इको लाइफ तथा जेबीएम यांची होती. इंजिन बिघाडामुळे एखाद्या बसच्या बॅटरी पॅकमध्ये (०४ बॅटरी पॅक) शार्टसर्किट झाल्याने आग लागल्याचे कर्मचाऱ्याच्या निदर्शनास आल्याचे एनएमएमटी प्रशासनाने कळवले.
कर्मचाऱ्यांनी त्वरित याबाबत उपलब्ध फायर एक्स्टिंग्वीशरने आग आटोक्यात आणण्याचे प्रयत्न केले; परंतु ४ बॅटरी पॅक असल्याने व ते सील असल्याने आग गतीने पसरली. यामुळे अपघातग्रस्त बससह बंद ३ डिझेल बस (मे. महालक्ष्मी बस ट्रान्सपोर्ट प्रा.लि. यांच्या कंत्राटमधील) यांनाही आग लागल्याने त्यांचेही नुकसान झाले, असे एनएमएमटी प्रशासनाने म्हटले.
आगारात रिक्षा पार्किंग?
आगारात बस व अधिकाऱ्यांची वाहने वगळता इतर वाहनांना प्रवेश नसतानाही सर्व्हिस सेंटरला लागूनच रिक्षा उभ्या असल्याचे दिसून आले. त्यावरून आगारात रिक्षा पार्किंग होते? की इतर कोणत्या कामासाठी रिक्षांचा वापर होतोय? असा प्रश्न नागरिकांना पडला आहे.