नेरुळमध्ये बारबालेच्या अपहरणाचा प्रयत्न

रिक्षातून घरी चाललेल्या बारबालेच्या अपहरणाच्या प्रयत्नाची घटना गुरुवारी रात्री नेरुळमध्ये घडली.

नवी मुंबई : रिक्षातून घरी चाललेल्या बारबालेच्या अपहरणाच्या प्रयत्नाची घटना गुरुवारी रात्री नेरुळमध्ये घडली. बारबालेला बेशुद्ध करण्याचा प्रयत्न करून रिक्षाचालकाला चाकूचा धाक दाखवून बारमधील नियमित ग्राहकानेच हा प्रकार केला. मात्र, वेळीच काही तरुणांनी तिच्या मदतीला धाव घेतल्याने पुढील गैरप्रकार टळला.
गुरुवारी रात्री हा प्रकार घडला. परिसरातच राहणारी एक बारबाला रिक्षाने घरी येत होती. त्या वेळी दबा धरून बसलेल्या एका व्यक्तीने तिची रिक्षा थांबवून तिला बेशुद्ध करण्यासाठी तोंडावर स्पे्र मारला. त्यानंतर रिक्षाचालकाला चाकूचा धाक दाखवून बारबालेच्या अपहरणाचा प्रयत्न केला. मात्र, सदर बारबालेने बचावासाठी आरडाओरडा केला असता, परिसरात उभ्या असलेल्या काही तरुणांनी तिच्या मदतीला धाव घेतली. त्यांनी पाठलाग करून अपहरण होत असलेल्या बारबालेची सुटका केली, शिवाय संबंधिताला नेरुळ पोलिसांच्या ताब्यात दिले. याप्रकरणी नेरुळ पोलीस ठाण्यात गुन्हा दाखल करण्यात आला असून एकाला अटक करण्यात आली आहे. तो पुण्याचा राहणारा असून बारबाला काम करत असलेल्या बारमधील नियमित ग्राहक आहे.