बंदी झुगारून पांडवकडा येथे गेलेल्या २९ पर्यटकांना अटक

नवी मुंबई येथील पांडवकडा धबधबा हा अतिशय धोकादायक आहे.

खारघर: नवी मुंबई येथील पांडवकडा धबधबा हा अतिशय धोकादायक आहे. त्याठिकाणी गेल्या काही वर्षात आठ ते दहा पर्यटकांचा बुडून मृत्यू झालेला आहे. यावर्षी पांडवकडा धबधबा येथे जाण्यास पोलिसांनी बंदी घातली होती परंतु बंदी आदेश झुगारून अनेक पर्यटक पांडवकडा या ठिकाणी जात होते. मागील आठवड्यात देखील पांडवकडा येथे 25 पर्यटक अडकले होते तेव्हा खारघर पोलिसांनी जीव धोक्यात घालून त्यांची सुटका केली होती. परंतु तरीसुद्धा पर्यटक सतत बंदी आदेश झुगारून पांडवकडा येथे जात असल्याने आज खारघर पोलिसांनी कठोर भूमिका घेत भारतीय दंडविधान संहिता कलम 188 अन्वये गुन्हा दाखल करून  29 पर्यटकांना अटक केली आहे. पर्यटकांनी धोकादायक पांडवकडा धबधबा येथे जाऊ नये असे आवाहन खारघर पोलीस ठाण्याचे वरिष्ठ पोलीस निरीक्षक प्रदीप तिदार यांनी केले आहे.