- नामदेव मोरेनवी मुंबई : कोरोना नियंत्रणासाठी महानगरपालिकेच्या तिजोरीवरील ताण वाढू लागला आहे. मार्चपासून जवळपास १३७ कोटी रुपये खर्च करण्यात आले आहेत. राज्य आपत्ती निवारण निधीतून २५१ कोटी रुपये मिळावे, असा प्रस्ताव महानगरपालिकेने शासनास दिला आहे. आतापर्यंत शासन व आमदार निधीतून मनपास ११ कोटी ८८ लाख रुपये मिळाले असून, जास्तीत जास्त निधी मिळावा, यासाठी पाठपुरावा सुरू करण्यात आला आहे.नवी मुंबईमध्ये १३ मार्चला पहिला रुग्ण सापडला. फिलिपाइन्सवरून आलेल्या व्यक्तीला कोरोना झाल्याचे निदर्शनास येताच, महानगरपालिकेने तत्काळ संपूर्ण लक्ष कोरोना नियंत्रण व उपाययोजनांवर केंद्रित केले. वाशीतील प्रथम संदर्भ रुग्णालयाचे डेडिकेटेड कोविड रुग्णालयात रूपांतर करण्यात आले. रुग्णवाढीचा अंदाज लक्षात घेऊन वाढीव बेड्स, औषध खरेदी व इतर सुविधा उपलब्ध करून दिल्या जात आहेत. शहरातील रुग्णसंख्या ३० हजार झाली असून, आतापर्यंत २६ हजार नागरिक कोरोनामुक्त झाले आहेत. साडेसहाशे नागरिकांचा कोरोनामुळे मृत्यू झाला आहे. प्रतिदिन ३०० ते ४०० नवीन रुग्ण वाढत असून, त्यांच्यावर उपचार करण्यासाठी प्रचंड खर्च करावा लागत आहे. महानगरपालिकेने मार्चपासून जवळपास १३७ कोटी रुपये खर्च केले आहेत. खर्चाचा आकडा प्रतिदिन वाढत चालला आहे.कोरोनामुळे पालिकेच्या उत्पन्नावरही परिणाम झाला आहे. मालमत्ता, पाणी व इतर करांतून येणारी रक्कम वेळेत मिळत नाही. खर्चाचा आकडा मात्र झपाट्याने वाढत आहे. महामारीशी मुकाबला करण्यासाठी शासनाकडूनही निधी मिळविण्यासाठी प्रयत्न सुरू केले आहेत. शासनाच्या आपत्ती निवारण विभागातून नवी मुंबई महानगरपालिकेस २५१ कोटी रुपये मिळावे, अशी मागणी महानगरपालिकेने केली आहे. त्यासाठी पाठपुरावाही सुरू केला आहे. आतापर्यंत शासनाने महानगरपालिकेला १० कोटी ४० लाख रुपये व १ कोटी ४४ लाख रुपये आमदान निधी मिळून ११ कोटी ८८ लाख रुपये मिळाले आहेत. याशिवाय शासनाकडून दहा अत्याधुनिक व्हेंटिलेटर्सही मिळाले आहेत.शासनाकडून जास्तीत जास्त निधी उपलब्ध झाल्यास मनपाच्या तिजोरीवरील भार काही प्रमाणात हलका होणार आहे. यामुळे प्रशासनानेही पाठपुरावा सुरू केला आहे. कोरोनाचे संकट अजून काही महिने सुरूच राहणार आहे.एमएमआर परिसरात १,२०० कोटी खर्चनवी मुंबईसह एमएमआर परिसरात कोरोनाचा प्रादुर्भाव वाढत आहे. या परिसरात पाच जिल्ह्यांमधील सर्व महानगरपालिका व काही नगरपालिकांचाही समावेश होतो. ठाणे जिल्ह्याचे पालकमंत्री एकनाथ शिंदे यांनी नवी मुंबईमध्ये राधास्वामी सत्संग भवनमधील कोरोना उपचार केंद्राचे उद्घाटन करताना या परिसरात आतापर्यंत १,२०० कोटी रुपये खर्च करण्यात आले असल्याची माहिती दिली आहे. या निधीमधून नवीन रुग्णालय उभारणी, औषध पुरवठा व इतर उपकरणांचा समावेश आहे.
आतापर्यंत केलेली कामे- वाशी सिडको प्रदर्शन केंद्रामध्ये १,२०० बेड्सचे विशेष रुग्णालय-तुर्भे राधास्वामी सत्संग भवनमध्ये ३५ हजार चौरस क्षेत्रफळावर ४११ आॅक्सिजन बेड्सचे रुग्णालय-नेरुळमधील मनपा रुग्णालयात प्रतिदिन १ हजार क्षमतेची आरटीपीसीआर लॅबची उभारणी- एपीएमसीमधील निर्यात भवनमध्ये ५१६ आॅक्सिजन बेड्स क्षमतेने रुग्णालय- सानपाडा एमजीएम रुग्णालयाच्या इमारतीत ७५ आॅक्सिजन बेड्स क्षमतेचे रुग्णालय- ऐरोली सेक्टर १५ मधील पाटीदार समाज भवनमध्ये ३०२ बेड्सचे कोविड केअर सेंटर- वाशीतील प्रथम संदर्भ रुग्णालयात १७५ बेड क्षमतेचे डेडिकेटेड कोविड रुग्णालयात रूपांतर- पनवेलमधील इंडिया बुल्स इमारतीमध्ये १,०८० बेड्सचे कोविड केअर सेंटरची उभारणी- कोपरखैरणे सेक्टर ५ मधील समाज मंदिरात ७० बेड्सची व्यवस्था- नेरुळमधील आगरी कोळी भवनमध्ये १०० बेड्सची केंद्र सुरू- ऐरोली सेक्टर ५ मधील समाज मंदिरात ७६ बेड्सचे केंद्र- नेरुळ सेक्टर ९ मधील केंद्रामध्ये ५५ बेड्सचे केंद्र- सीबीडी सेक्टर ३ मधील बहुउद्देशीय केंद्रात ९६ बेड्सची व्यवस्था- वाशी सेक्टर १४ मधील बहुउद्देशीय इमारतीमध्ये १०८ बेड्सची व्यवस्था- वाशीतील ईटीसी केंद्रांमध्ये महिलांसाठी १५० बेड्सचे केअर सेंटर- डॉ. डी.वाय. पाटील रुग्णालयाबरोबर २०० आयसीयू बेड्ससह ८० व्हेंटिलेटर्ससाठी करार