इंडिगो कंपनीच्या एका प्रशिक्षणार्थी पायलटने तीन वरिष्ठ अधिकाऱ्यांविरोधात जातीयवादाचा आरोप केल्याचे समोर आले. ट्रेनी पायलटने दिलेल्या तक्रारीनुसार, 'तीन अधिकाऱ्यांनी त्याला सांगितले की तो विमान उडवण्यास लायक नाही आणि त्याने जाऊन बूट शिवावे. या प्रकरणाबाबत पोलिसांकडे तक्रार दाखल करण्यात आली आहे.
इंडिगोचे अधिकारी मनीष साहनी, तापस डे आणि कॅप्टन राहुल पाटील यांच्याविरुद्ध एससी/एसटी कायद्यांतर्गत एफआयआर दाखल करण्यात आला आहे. ही तक्रार आधी बंगळुरूमध्ये करण्यात आली होती. तिथे पोलिसांनी झिरो एफआयआर नोंदवला होता. त्यानंतर, ती तक्रार गुरुग्राम येथे हस्तांतरित करण्यात आली, गुरुग्राममध्ये इंडिगोचे मुख्यालय आहे. गुन्हा कुठेही झाला असला तरी कोणत्याही पोलिस ठाण्यात शून्य एफआयआर दाखल करता येतो.
पायलटचे आरोप काय?
तक्रारीनुसार, प्रशिक्षणार्थी वैमानिकाने २८ एप्रिल रोजी गुरुग्राम येथील इंडिगोच्या मुख्यालयात झालेल्या बैठकीचा उल्लेख केला आहे. ही बैठक सुमारे ३० मिनिटे चालली आणि या दरम्यान तक्रारदाराला सांगण्यात आले की, "तुम्ही विमान उडवण्यास योग्य नाही, परत जा आणि बूट शिवून घ्या. तुम्ही येथे चौकीदार राहण्यासही योग्य नाही." अधिकाऱ्यांना त्याचा राजीनामा हवा असल्याने त्याचा छळ करण्यात आला, असा प्रशिक्षणार्थी वैमानिकाचा आरोप आहे.
पायलटने व्यावसायिक छळाला सामोरे जावे लागल्याचे आरोपात म्हटले आहे. तक्रारदाराची कोणत्याही कारणाशिवाय पगार कपात करण्यात आली. पुन्हा प्रशिक्षण घेण्यास भाग पाडण्यात आले आणि कोणत्याही कारणाशिवाय वॉर्निंग पत्रे देण्यात आली. तक्रारदाराने हा विषय उच्च अधिकाऱ्यांसमोर आणि इंडिगोच्या समितीसमोर उपस्थित केला होता. पण कोणतीही कारवाई करण्यात आली नाही. शेवटी तक्रारदाराने पोलिसांत तक्रार दाखल केला.